“Mədəniyyətimizin zənginləşməsində Aşıq Ələsgər amilindən istifadə mexanizmi” elmi konfransı iştirakçılarına

Hörmətli dostlar! İlk növbədə hər birinizi salamlayır, elmi tədbirin maraqla baş tutacağına ümid bəsləyir, sizlərə, konfransın işinə uğurlar diləyirəm!

Mədəni irsimizin zənginləşməsi və inkişafına Aşıq Ələsgər fenomeninin təsiri və ondan istifadəsi kimi geniş, maraqlı və böyük əhəmiyyət daşıyan mövzunun müzakirəsi müasir tariximizdə baş verən proseslər üçün xüsusi məna kəsb edir. Çünki Dədə Ələsgər möcüzələrlə dolu yaradıcılığının dərinliyinə, rəngarəng çalarına, poetik dəyərinə görə Azərbaycan-Türk ədəbi irs xəzinəsində, İslam və təsəvvüf dünyasında haqlı olaraq aşıq poeziyasının zirvəsi hesab edilən cahanşümul dini-fəlsəfi-poetik düha olaraq, ədəbi irsimizə ən yüksək bədii-estetik meyarlarla yeni məzmun qazandırmışdır. Təsadüfi deyil ki, Ələsgər poeziyası gözəlliklə (bu qeyri-adi sözün geniş, tam fəlsəfi mənasında), müdrikliklə, bəşər idrakının kamilliyi ilə çalxalanan dərin, sirli-sehrli, müəmmalı, möcüzəli, tilsimli bir ümman olaraq Vətən gözəlliklərini və ona sevgini, ana dilimizin saflığını, məna potensialını və hüdudsuz ifadə imkanlarını özündə ehtiva edir.

Aşıq Ələsgər yaradıcılığı Azərbaycan aşıq sənətinin ümumbəşəri dəyərlər sırasında qorunan dünya qeyri-maddi mədəni irs nümunələri siyahısına salınmasında xüsusi rol oynamış və Azərbaycan Respublikasında əsərləri dövlət varidatı elan edilən müəlliflərin siyahısına daxil edilmişdir. Aşıq Ələsgər ədəbiyyatımızda yeganə poeziya dühasıdır ki, Azərbaycan klassik və aşıq yaradıcılığının bütün formalarında ən yüksək meyarlara cavab verən şeir nümunələri qoyub getmiş, yeni çoxsaylı formalar yaratmışdır.

Keçən əsrin birinci yarısında yaranıb bu günə qədər inkişaf edən, Dədə Ələsgər fenomeninin, sirrlərlə dolu yaradıcılığının sehrini açmağa, təhlil və tədqiq etməyə yönələn ələsgərşünaslıq, korifey ədəbiyyatşünaslarımız Hümmət Əlizadə, Məmmədhüseyn Təhmasib, Həmid Araslı, Əhliman Axundov, Yaşar Qarayev, İslam Ələsgər, Qara Namazov, Hüseyn İsmayılov və son vaxtlar tədqiqatları, ayrı-ayrı yazılarıyla diqqəti cəlb edən Fəxrəddin Salim, Nağdəli Zamanov, Adilə Nəzərova, Salman Balakişiyev və bir çox başqalarının ciddi tədqiqatlarına baxmayaraq hələ də bu əzəmətli xəzinənin müəmmalarını, sirlərini bütövlüklə aşkar edə bilməmişdir. Bu isə, tədqiqatçılar, ələsgərşünaslar qarşısında yeni üfüqlər açır, yaradcılıq zövqü aşılayan imkanlar yaradır. Uğurlar diləyirəm bu çətin, eyni zamanda çox şərəfli işə baş qoyan, ömür sərf edən hər bir yaradıcı insana!

Aşıq Ələsgərin anadan olmasının 200 illiyi ilə bağlı yubileyin qeyd edilməsi haqqında Azərbaycan Respublikası Prezidentinin Sərəncamlarının həyata keçirilməsi Respublikanın bütün bölgələrində ümumxalq bayramına çevrildi. Eyni zamanda Dədənin Bakıda qoyulacaq heykəliylə yanaşı, bizləri Aşıq Ələsgər adına ozan evinin, metro stansiyasının, gəminin yaradılmasına, əsərlərinin qorunmasına və akademik nəşrinin təşkilinə sövq edir, bu istiqamətdə ciddi işlər görməyə imkanlar yaradır. Bu sahədə “Qərbi Azərbaycan icması”nın, “Dədə Ələsgər ocağı ictimai birliyi”nin və hər birimizin üzərinə ciddi məsuliyyət düşür.

Aşıq Ələsgər şəxsiyyəti və yaradıcılığı Qurani Kərimin, Vətənin, poeziyanın, təbiətin, bəşər övladının, dilimizin, milli adət-ənənələrimizin gözəlliklərini dərindən anlamaq üçün müasir dövrümüzdə də hər birimizin, xüsusilə gənclərimizin zehni, ruhi, mənəvi, əxlaqi tərbiyəsində mühüm rol oynayan amillər kimi daim diqqət mərkəzində olmalıdır.

Dədə Ələsgərin müqəddəs ruhu, vergili şəxsiyyəti, dərin, müdrik, hikmətli poeziyası və xalqımızın onun bu dəyərlərinə dərin inamı, ölkə Prezidentinin uzaqgörən siyasəti, dəqiqliklə hesablanmış strategiyası zəminində öz itirilmiş dədə-baba yurdlarımızla qovuşmağa dərin inam, ümid və əminlik yaradır!

Əziz dostlar! Konfransda ediləcək çıxışların, onlarda səslənəcək dəyərli təkliflərin və qəbul edəcəyiniz qərarların mədəniyyətimizin inkişafında və zənginləşməsində mühüm rol oynayacağına əminliyimi bildirirəm!
Diqqətinizə görə təşəkkür edirəm!

Hörmətlə,
Ələddin Allahverdiyev,
Professor, Moskva.