Qərbi Azərbaycan Xronikası: "Aşıq Ələsgərlə Molla İbrahim arasında yaradıcılıq bəhsləri olub"

Goyce.az xəbər verir ki, "Baku TV"-nin "Qərbi Azərbaycan Xronikası" layihəsi çərçivəsində növbəti veriliş efirə gedib.

Jurnalist Rufik İsmayılovun budəfəki müsahibi fəlsəfə doktoru, araşdırmaçı Abbas Bağırov olub.

O, Göyçənin qüdrətli saz-söz ustadlarından sayılan Aşıq Bəhmən Göyçəlinin həyat və fəaliyyətindən, yaradıcılığından söz açıb. Bildirib ki, Göyçə aşıq məktəbinin layiqli yetirməsi Bəhmən İbrahim oğlu Qarayev 1901-ci ildə Basarkeçər rayonunun Hüseynquluağalı (Nərimanlı) kəndində anadan olub. Aşıq Bəhmən ilk təhsilini mollaxanada, daha sonra isə İrəvanda Hüseynqulu Xan məscidinin nəzdində fəaliyyət göstərən mədrəsədə alıb.

Bəhmənin atası Molla İbrahimlə Aşıq Ələsgər kirvə olduqları üçün onların evində tez-tez saz-söz məclisləri keçirilib, hər iki ustad arasında yaradıcılıq bəhsləri baş tutub. Uşaq yaşlarından bu deyişmələrin, şeirlərin, dastanların təsiri altında böyüyən və onları öz "sinə dəftəri"nə yazan Bəhmən zaman keçdikcə həmin yaradıcılıq nümunələrinin qiraətçisinə və təbliğatçısına çevrilib. Gənclik illərindən el-oba arasında aşıq-şair kimi tanınıb, toy-düyünlərə dəvət olunub. Onun gəraylı, qoşma, müxəmməs, qəzəl, divani, dodaqdəyməz, cığalı təcnis və digər janrlarda qələmə aldığı şeirlər dillər əzbəri olub.

Araşdırmaçı Abbas Bağırov ədəbiyyat tarixində həm şair, həm də ustad aşıq kimi tanınan Bəhmən Göyçəlinin doğma kəndindəki fəaliyyətindən və soydaşlarımıza göstərdiyi xidmətlərdən də bəhs edib. Vurğulayıb ki, o, Hüseynquluağalıda sovet sədri, kolxozda briqadir və sıravi kolxozçu kimi çalışıb. Sovet sədri işlədiyi dövrdə kəndin adının dəyişdirilərək erməni toponimi ilə əvəzlənməsinin qarşısını alıb. Həmkəndlisi, böyük nüfuz sahibi, ictimai-siyasi xadim Talıb Musayevlə məsləhətləşərək, kəndin Nəriman Nərimanovun şərəfinə "Nərimanlı" adlanmasına nail olub.

A.Bağırov qeyd edib ki, Aşıq Bəhmənin həyat və yaradıcılığı Vətən həsrətinin təsiri altında formalaşıb. O, ustad aşığın şeirlərindən nümunələr səsləndirərək bildirib ki, Aşıq Bəhmənin yaradıcılığı bu gün də aktuallığını qoruyur və Göyçə aşıq məktəbinin gənc nümayəndələri mütəmadi olaraq onun irsinə müraciət edirlər.

Xatırladaq ki, Qərbi Azərbaycan Xronikası layihəsinin məqsədi tarixi torpaqlarımızın adının yaşadılması, tanıdılması, həmçinin azərbaycanlıların ermənilər tərəfindən deportasiyaya məruz qoyulması, həmin ərazilərdə mövcud olmuş, lakin adı silinən toponimlərin, saysız-hesabsız yeraltı və yerüstü maddi mədəniyyət nümunələri - qədim yaşayış məskənləri, nekropollar, kurqanlar, qala, saray və istehkam qalıqları, karvansaralar, körpülər, qəbirüstü sənduqələr, xaçdaşlar, at-qoç heykəlləri, məbəd, kilsə, məscid, pir və ocaqların üzə çıxarılması, həmin ərazinin təmiz oğuz-türk məskənləri olduğunu təsdiq edən faktların dünya ictimaiyyətinə çatdırılmasıdır.

Həmçinin Prezident İlham Əliyevin Qərbi Azərbaycanla bağlı dediyi "XX əsrin əvvəllərinə təsadüf edən xəritə bir daha onu göstərir ki, Qərbi Azərbaycan tarixi Azərbaycan diyarıdır, şəhərlərin, kəndlərin adları Azərbaycan mənşəlidir və biz yaxşı bilirik ki, indiki Ermənistan ərazisində tarix boyu Azərbaycan xalqı yaşayıb. İndi əsas vəzifə ondan ibarətdir ki, dünya ictimaiyyəti də bunu bilsin", - fikrini əsas tutaraq, Qərbi Azərbaycan İcmasının hazırladığı Qayıdış Konsepsiyasından irəli gələn vəzifələrin təbliğidir.

Bundan əlavə, Qərbi Azərbaycanla bağlı tarixçilərin, araşdırmaçıların düşüncələrini, deportasiyaya məruz qalmış şəxslərin həyat hekayəsini işıqlandırmaqdır.