Rizvan Talıbov: “1988-1991-ci ilər ərzində Ermənistandan qaçqın düşmüş 500000 (beş yüz min) bu günkü faktiki sayları 1.000000-u (bir milyonu) keçmiş Ermənistan qaçqınlarının məsələsi sülh danışıqlarının predmeti olmalıdır”

11 oktyabr 2019-cu il Qərbi Azərbaycan (Ermənistana) Qayıdış Birliyinin təşkilatçılığı ilə, “İndiki Ermənistandan (Qərbi Azərbaycandan) yerli aborigen azərbaycanlı əhalinin deportasiyası və soyqırımı tarixi Yurdlara Qayıdış perspektivləri” adlı dəyirmi masa keçirilib. Məlumat üçün bildirək ki, bu tədbirin BMM-də keçirilməsi üçün razılıq əldə olunsa da, son anda BMM tərəfindən tədbirin keçirilməsinə imtina cavabı verilib. Buna baxmayaraq birliyin tərəfdarları Tbilisi prospekti 76 ünvanda yerləşən ofisdə, nəzərdə tutulmuş tədbiri keçirməyə nail olublar.

Tədbiri giriş sözü ilə açan Qərbi Azərbaycan (Ermənistana) Qayıdış Birliyinin sədri Rizvan Talıbov iştirakçıları salamlayaraq göstərilən maneələrə baxmayaraq, tədbirin baş tutduğuu elan etdi. O, çıxışında Qərbi Azərbaycandan tarixin müxtəlif mərhələlərində zorla deportasiya olunmuş azərbaycanlıların təşkilatlanaraq öz hüquqları uğrunda mübarizə aparmaqlarının zəruri olduğunu diqqətə çatdırdı. O, qeyd etdi ki, prezident İlham Əliyev dəfələrlə çıxışlarında indiki Ermənistanın yerləşdiyi ərazilərin Azərbaycanın tarixi torpaqları olduğunu vurğulayıb və bəyan edib ki, biz o torpaqlara qayıdacağıq. R.Talıbov vurğuladı ki, təmsil etdiyi birlik ölkə başçısının məlum çıxışlarını əldə rəhbər tutaraq, fəaliyyətini bu prinsiplər üzərində davam etdirməkdə israrlıdır: “Fəaliyyətimizi mövcud qanunvericiliyin bütün tələblərinə uyğun qurmağımıza baxmayaraq Ədliyyə Nazirliyi birliyin qeydiyyat üçün müraciətlərinə müsbət cavab vermir. Biz istəyirik ki, 1988-ci ilə qədərki Qərbi azərbaycanlıların yaşadığı ərazilərə muxtariyyət verilsin. Eyni zamanda 1990-cı illərdə humanist addım kimi qiymətləndirilərək ləğv edilmiş Qərbi azərbaycanlıların qaçqın statusu bərpa edilsin, bu qəbildən olan insanların ikili vətəndaşlıq məsələsi gündəmə gətirilsin. Prezident İlham Əliyevin Valday klubunda 250 min azərbaycanlının Ermənistandan qovulması barəsində söylədiyi fikirlər hamımızın ürəyincədir” .

Daha sonra çıxış edən Ümid partiyasının sədr müavini Rüfət Muradlı qeyd etdi ki, Qarabağ müharibəsi başlayandan sonra Qərbi Azərbaycan məsələsi arxa plana keçdi. O vurğuladı ki, Qərbi Azərbaycana qayıdış yolu Qarabağdan keçir. Qarabağ Azadlıq Təşkilatının nümayəndəsi çıxışında hər iki qurumun birgə tədbirlər keçirərək birləşməsini təklif etdi. YAP Səbail rayon təşkilatının sədr müavini Arzuman Muradlı ulu öndər Heydər Əliyevin və prezident İlham Əliyevin Qərbi azərbaycanlıların problemlərinə həmişə həssas yanaşdığını dilə gətirdi. O, qeyd etdi ki, Dağlıq Qarabağ və Qərbi Azərbaycanın problemləri mövcud hakimiyyətin prioritet məsələlərindən biridir və gələcəkdə də bu istiqamətdə Azərbaycan hakimiyyəti hüquqi çərçivədə fəaliyyətini davam etdirəcək.

Daha sonra Çeçenistanda Azərbaycan diasporasının rəhbəri Şahin Əmirxanov,"Dünya"analar səsi" İB-nin sədri Sitarə Zəngəzurlu, mərhum yazıçı Fərman Kərimzadənin qızı Yeganə Kərimzadə, rəssam, ictimai fəal Elnurə İsgəndərova, sənədli filmlər rejissoru Kəmalə Musazadə, Mayıl Vəliyev, Xuraman Tarverdiyeva və digərləri çıxış edərək indiki Ermənistan ərazisində yerləşən dədə-baba yurdlarının unudulmaması və illər öncə pozulmuş hüquqlarının bərpası uğrunda səylərinin gücləndirəcəklərini bəyan etdilər. Söz alan qonaqlar Qərbi azərbaycan uğrunda bundan sonra da fəal mübarizə aparacaqlarını və işğal faktoru ilə heç vaxt barışmayacaqlarını vurğuladılar.

Tədbirin sonunda tarixi Azərbaycan torpaqları üzərində qurulmuş indiki Ermənistan Respublikası ərazilərindən zaman-zaman deportasiya edilib, soyqırıma məruz qoyulmuş azərbaycanlı qaçqın əhali adından, Qərbi Azərbaycan (Ermənistana) Qayıdış Birliyi adından Beynəlxalq təşkilatlara BMT, ATƏT, AŞPA, İƏT, Minsk qrupu həmsədr ölkələrinə, Azərbaycanın aidiyyatlı dövlət orqanlarına, Minsk qrupu həmsədr ölkələrinin XİN rəhbərlərinə müraciət qəbul olundu.