Vətənə və xalqa xidmət nümunəsi

İnsan həyatı boyu çox insanlarla üzləşir, ünsiyyət qurur və ya qurmaq istəmir. Onların içində elə kəslər olur ki, ünsiyyət yaxınlığından şəxsiyyət yaxınlığına keçə bilirsən. Sonradan bu, “dostluq” deyilən və böyük mənası olan münasibətlər müstəvisinə keçə bilir. Möhsüm Qədiroğlu Aslanov ünsiyyətdə olduğu çox insana dost ola bilib. Hətta ondan daha yaxın münasibətlər yarada bilib. İndi Möhsüm Qədiroğlu haqqında “o, mənim əsl dostumdur” deyə bilən insanlar çoxdur! Lakin Möhsüm Qədiroğlunun 50 yaşında ancaq şəxsi münasibətləri ilə məhdudlaşmaq heç doğru deyil. Çünki o, sözün həqiqi mənasında həm də sosial fəallığı olan, mənsub olduğu milləti və vətəndaşı olduğu dövləti üçün çalışan bir şəxsdir! Möhsüm Qədiroğlunun həyatının bu aspekti maraqlı faktlarla zəngindir.

Onun iki təhsili var. BDU-da jurnalist, Taras Şevçenko adına Kiyev Milli Universitetində dövlət qulluqçusu ixtisaslarına yiyələnib. Bu, yalnız statistik fakt deyil, Möhsümün şəxs kimi təkamül xəttidir. Tərcümeyi-halından bir parçadan o xətti aydın görmək olar: “...1994-cü ildən 2002-ci ilədək “Azərbaycan Dövlət Teleradio Verlişləri QSC”-nin xəbərlər redaksiyasında redaktor vəzifəsində fəaliyyət göstərib. 2002-ci ildən 2019-cu ilədək həmin qurumun mərkəzi Kiyev şəhərində olmaqla Ukrayna və Şərqi Avropa ölkələri üzrə nümayəndəliyinin rəhbəri vəzifəsində çalışıb.

Ukraynada Ukrayna Azərbaycanlıları Konqresinin, Belarus Respublikasında Belarus Azərbaycan İcmaları Konqresinin, Moldova Respublikasında Moldova Azərbaycanlıları Konqresinin qurulmasında və formalaşmasında, o cümlədən sözü gedən ölkələrdə Azərbaycan Gənclər Birliyinin yaradılmasında yaxından iştirak edib. Azərbaycan həqiqətlərinin Ukrayna və Şərqi Avropa ölkələrinin İctimaiyyətinə çatdırılmasında səmərəli fəaliyyət göstərib. 2003-cü ildən başlayaraq “Xocalıya Ədalət!” kampaniyası çərçivəsində Ermənistanın Ukraynadakı səfirliyinin, BMT-nin və ATƏT-in Ukraynadakı nümayəndəliklərinin qarşısında etiraz aksiyalarının əsas təşkilatçılarından biri olub”.

Bu parçadakı faktlarda Möhsüm Qədiroğlunun peşəsi ilə milli kimliyini və vətəndaşlığını maksimum dərəcədə bir-biri ilə əlaqəlindirən vətənsevər olduğu aydın görünür. Jurnalist kimi AZTV-yə işlədiyi sahə üzrə çevik və maraqlı infomasiyalar hazırlamaq onun fəaliyyətinin yalnız bir fraqmentidir. Bu informasiyaların hər birində Azərbaycan dövləti və cəmiyyəti üçün əhəmiyyəti, qiyməti və dəyəri olan məqamların ifadə edilməsinə xüsusi önəm verib. Həmin informasiyalarda ulu öndər Heydər Əliyevin siyasi liderliyi, dövlət quruculuğunun uğurları, Prezident İlham Əliyevin dövlət başçısı kimi həyata keçirdiyi uğurlu siyasətin məziyyətləri başlıca yer tuturdu. Möhsüm Qədiroğlu bunu Vətən sevgisi və millət təəssübkeşliyi ilə edib və indi də etməkdədir. Yuxarıdakı parçada onun Ukrayna, Belorus və Moldovada yaşayan zərbaycanlıların təşkilatlanmasında çox fəal rol oynadığı yer alıb. Möhsüm Qədiroğlu həmişə bu istiqamətdə fəaliyyətdən danışanda ulu öndəri nümunə kimi göstərir və qürur duyduğunu açıq deyir.

O, Heydər Əliyevin böyük lider ustalığı və güclü məntiqlə xaricdə yaşayan azərbaycanlıların təşkilatlanması zərurətini insanlara izah etdiyindən fəxarətlə bəhs edir. Möhsüm yalnız sözdə “Prezidentin əsgəri” olduğunu deməyib, o, əməlində bunu sübut edib. Sübutmu? Buyurun, tərcümeyi-halından növbəti parça: “Ukrayna və Şərqi Avropa ölkələrində fəaliyyət göstərdiyi illərdə onun ssenarisi əsasında Ukraynada və Moldovada “Heydər Əliyev İki Əsrin Fenomeni” sənədli filmləri (1-ci və 2-ci hissə), Ulu Öndərin xatirəsinə həsr olunmuş “Heydər Əliyev İnsanlığa Bağışlanan Ömür”, “Oddan Doğulan Xalq”, “Azərbaycan - Minilliklərin tarixinə yeddi günlük səyahət”, “Qarabağ tarixin burulğanında” və bir sıra sənədli filmlər çəkilərək Azərbaycan, Ukrayna və Moldovanın dövlət televiziyalarında efirə verilib”.

Bəli, həmin filmlərin hansı zəhmət bahasına hazırlandığının şahidiyik. M.Qədiroğlunun bu fəaliyyəti erməniləri çox qıcıqlandırmışdı. Hətta onun ssenarisi ilə çıkilmiş “Qarabağ Tarixin Burulğanında” filmi Ukraynanın Dövlət Televiziyasında efirə getdikdən sonra Ermənistan Xarici İşlər Nazirliyi Ukrayna dövlətinə rəsmi etiraz notası göndərmişdi. Üstəlik, bu azərbaycanlı jurnalist-vətənsevər Xocalı soyqrımının və Qarabağ həqiqətlərinin aktiv şəkildə Şərqi Avropada yayılmasında və Ermənistan səfirliyi önündə etiraz aksiyalarının əsas təşkilatçılarından biri olduğu üçün təzyiq hədəfinə çevrilmişdi. Xocalıda ermənilərin törətdikləri vəhşiliklərin açıq şəkildə və obyektiv olaraq dünya ictimaiyyətinə çatdırılması informasiya savaşında Azərbaycan üçün mühüm əhəmiyyət kəsb edən məsələdir. Bu həm Ermənistanın aqressiv və antihumansit siyasətinin beynəlxalq aləmdə bilinməsi, həm də Azərbaycanın ədalətli mövqeyinin dünya tərəfindən qəbul edilməsi üçün Prezidentin qarşıya qoyduğu vəzifələrdən biridir. Uzun illərdir ki, rəsmi İrəvanın və erməni diasporunun iştirakı ilə dünyanın müxtəlif ölkələrində “erməni soyqırımı” təbliğatı aparılır. Bunun nəticəsində dünya ictimaiyyəti sanki Türkiyə və Azərbaycan tərəfinin səsinə laqeydlik göstərirlər. Buna görə də Prezident İlham Əliyevin informasiya hücumunu önə sürməsi çox əhəmiyyətli bir addım idi. Möhsüm Qədiroğlu peşəsi və tutduğu vəzifə imkanları daxilində bu istiqamətdə əlindən gələni əsirgəməyib. Bu baxımdan Xocalı soyqrımı ilə bağlı Şərqi Avropa ölkələrində tədbirlərin və etiraz aksiyalarının təşkil edilməsi və bir sıra filmlərin çəkilməsi, stendlərin hazırlanması, azərbaycanlı gənclərlə təbliğat işlərinin aparılması bunun konkret nümunəsidir.

Əlbəttə, Xocalı ilə bağlı həqiqətlərin dünyaya çatdırılmasının rəsmi İrəvan üçün nə dərəcədə zərbə olduğunu ermənilər bilirlər. Bu səbəbdən də hər yerdə və bütün səviyyələrdə buna maneçilik etməyə çalışırlar.

Eyni zamanda, yuxarıda vurğulanan layihələr Ukrayna, Belorus, Moldova və Azərbaycan arasındakı tarixi-mədəni əlaqələrin inkişaf etdirilməsində, informasiya mübadiləsinin daha da güclənməsində müsbət rol oynadı. Təsadüfi deyil ki, Möhsüm Aslanov (Qədiroğlu) bu filmlərinə görə Ukraynanın “Qızıl Pero”, Moldova Respublikasının “Dostluq Medalı”, Belarus Jurnalistlər İttifaqının “Fəxri Diplomu”-na və Azərbaycanda “Qızıl Qələm” mükafatlarına layiq görülüb”. Biz türklərin yaxşı bir deyimi var: “bütün bunları Möhsüm öz gücü ilə alıb”! Hazırda Azərbaycan və Ukraynanın Yazıçılar və Jurnalistlər Birliyinin üzvü olan Möhsüm Qədiroğlu Respublika qəzetinin Ukrayna və Şərqi Avropa ölkələri üzrə xüsusi mübiri kimi eyni qərarlılıq, zəhmət və qətiyyətlə fəaliyyətini davam etdirir.

Əlbəttə, hər insanın öz həyat tarixçəsi vardır. Yolu adam özü seçir. Seçimin doğru olub-olmadığını isə ancaq həyat göstərir. Lakin bir insan yalnız özünü, ailəsini və yaxınlarını deyil, millətini və vətəndaşı olduğu dövləti də ömür yolunun sevdası kimi “özü”ndə daşıyırsa, onun qiymətini tarx verir. Yük ağırdır, təbii. Hər çiyin ona dözməz, hər ürək o ritmdə döyünməz. Xüsusilə, fürsətçilərin, karyeristlərin və ən əsası isə xarici düşmənin heç bir mübarizə meyarı gözləmədiyi bir dövrdə o yükü daşımaq heç asan deyil və hətta məcarasız ötüşmür! Bütün bunlara rəğmən Möhsüm Aslanov iradəsindən dönməyərək “Prezidentin əsgəri” olmaqdan qürur duyur!

Onu deməliyik ki, bizim Möhsümü təntənəli şəkildə təqdim etmək fikrimiz qətiyyən yoxdur. Məsələyə müasir tarixi mərhələdə azərbaycanlı jurnalistin şəxsi və ictimai maraqları uyğunlaşdırması, milli təəssübkeşliklə vətənsevərliyi və vətəndaşlığı birləşdirə bilməsinin sosial-psixoloji məna yükü prizmasında baxmağın faydası vardır. İndi bizim cəmiyyət üçün dövlətçilik şüuru o qədər aktual olub ki, hər bir vətəndaşın buna münasibəti əhəmiyyətlidir. Vətənsevərlikdən və dövlətçilikdən danışanda istənilən sahədə və istənilən vəzifədə iş başında olanların fəaliyyətinin əhəmiyyətini anlamaq gərəkdir. Bu bağlılıqda M.Qədiroğlu peşə fəaliyyətində milli mövqeyi ilə vətəndaşlığına nə dərəcədə yüksək qiymət verdiyini təsdiq edib. Bu yolda ona yeni uğurlar arzu edirik!

Füzuli QURBANOV,

fəlsəfə elmləri doktoru.
 
Goyce.az