BAKI DÖVLƏT UNİVERSİTETİNDƏ “Qərbi Azərbaycanda türk müsəlman abidələrinin erməni vandallığına məruz qalması” mövzusunda elmi seminar keçirilib - FOTOLAR

BDU Şərqşünaslıq fakültəsi İslamşünaslıq ETM-in “Qərbi Azərbaycanda türk müsəlman abidələrinin erməni vandallığına məruz qalması” mövzusunda elmi seminar keçirilib.

Öncə ölkəmizin ərazi bütövlüyü və suverenliyi uğrunda şəhidlik zirvəsinə ucalan Vətən övladlarının əziz xatirəsi bir dəqiqəlik sükutla yad edilib.

İclası giriş sözü ilə açan elmi işçi Əli Babayev “Qərbi Azərbaycanda türk müsəlman abidələrinin erməni vandallığına məruz qalması” mövzusu ilə bağlı geniş məlumat verərək bildirib ki, Qərbi Azərbaycan ərazisində min illər boyu yaşamız soydaşlarımızın etnik mövcudluğuna son qoyulması və onların mədəni irsinin məhv edilməsi son bir əsrdə Ermənistanın dövlət siyasəti səviyyəsində
gerçəkləşdirilmişdir. 

Nəticədə, azərbaycanlıların bu ərazilərin tarixi və əzəli sakinləri olduğunu sübut edən izləri yox etmək üçün məqsədyönlü şəkildə, kütləvi vandallıq aktları törədilmişdir. Etnik təmizləmə əksər hallarda məhz milli dini-ideoloji mərkəzlərin və dövlət orqanlarının sistemli fəaliyyəti ilə baş vermişdir. O, qeyd edib ki, 1902-ci ildə İrəvan quberniyasının statistika komitəsinin çap etdirdiyi yaddaş kitabçasına görə, İrəvan quberniyasında 310 məscid mövcuddur ki, onlardan da 7-si İrəvan şəhərində olub. Hazırda onlardan yalnız Göy məscid saxlanılır ki, o da Ermənistan dövləti tərəfindən “fars mədəniyyəti abidəsi” kimi təqdim olunur.

Sonra çıxış edən kiçik elmi işçi Elvin Babayev isə seminar iştirakçılarının nəzərinə indiki Ermənistan ərazisindəki İslamaqədərki alban abidələrinin tarixi ilə bağlı məlumat verib və qeyd edib ki həmin abidələrin hamısı erməni kilsəsi tərəfindən qriqoryanlaşdırılıb, onların arxitektur üslubları dəyişdirilib. O, 1905-1906, 1918-1921, 1948-1953, 1987-1991-ci illərdə Ermənistan tərəfindən həmin torpaqların aborigenləri olan Azırbaycanlıları deportasiyaya məruz qoyduqları və türk müsəlman mədəni irsinin məhv edilməsi, türbələr, karvansaraylar, məscidlər, körpülər, qalaların dağıdılması haqda məlumatlar verib.

Basarkeçər Rayon İcma Sədrinin gənclər və mətbuatla əlaqələr üzrə müavini İlqar İsmayılov tədbir iştirakçılarını salamlayaraq Qərbi Azərbaycana qayıdış ideyasının təməlini qoyan Ulu Öndər Heydər Əliyevin Qərbi Azərbaycanla bağlı nitqi, həmçinin Prezident İlham Əliyevin 24 dekabr 2022-ci il tarixində İcmanın binasının açılış mərasimindəki çıxışını xatırladıb. Prezident, Ali Baş Komandan İlham Əliyevin başçılığı altında hazırlanan, Qarabağ və Şərqi Zəngəzurun dirçəlişindən sonra Qərbi Azərbaycandan deportasiya edilən soydaşlarımızın hüquqlarının müdafiəsi ilə bağlı konsepsiya haqda məruzə edib. 
İcmanın fəaliyyəti, rayon və kənd icmalarının əhəmiyyəti, formalaşma prosesi, Qayıdış Konsepsiyası və qarşıda duran vəzifələr barədə çıxış edib.
O, Qərbi Azərbaycana qayıdışın tarixi faktlar, beynəlxaq hüquq və sülh prinsipləri əsasında mümkünlüyünü izah edib.

QAİ-nın üzvü Arzu Məmmədov Qərbi Azərbaycanda olan toponimlərin uydurma adlarla saxtalaşdırılması faktlarını qeyd edib.

Böyük Qayıdışa başlanıldığını xatırladan Eynulla Namazov Qərbi Azərbaycana qayıdışın da mümkün olacağını vurğulayıb.

Türkologiya kafedrasının müəllimi dosent Güləhməd İmanov Qərbi Azərbaycan həqiqətlərin təbliği, milli-mənəvi dəyərlərimizin nəsildən-nəsilə ötürülməsi baxımından bu mövzuda seminarların olduqca əhəmiyyətli olduğunu vurğulayıb.

Seminarda İştirak ediblər:
Mahir İsrafilov – böyük elmi işçi;
Mirzəyeva Yeganə Bilal qızı – aparıcı elmi işçi;
Babayev Əli Mirzə oğlu – elmi işçi;
Babayev Elvin Əliyar oğlu – kiçik elmi işçi;
Mahmudova Sevda Pənah qızı – laborant, Mehdiyeva Səbinə İsgəndər qızı – laborant, Ağayev Çingiz İlyas oğlu;
Güləhməd İmanov - Türkologiya kafedrasının müəllimi dosent;
İlqar İsmayılov - Basarkeçər Rayon İcma Sədrinin gənclər və mətbuatla əlaqələr üzrə müavini;
Basarkeçər rayonu Aşağı Şorca kənd icma sədri - Arzu Məmmədov;
Basarkeçər rayonu Babacan kınd icma sədrinin müavini - Eynulla Namazov;
Və BDU-in tələbə heyəti.

İrəvanda azərbaycanlılara məxsus milli-mədəni abidəmiz olan Göy məscidin Ermənistan dövləti tərəfindən “fars mədəniyyəti abidəsi” kimi təqdim olunmasına qarşı İslamşünaslıq ETM və Qərbi Azərbaycan İcmasının adından Beynəlxalq təşkilatlara etiraz məktubu göndərilməsi qərara alınıb.

goyce.az