9 may 2024-cü ildə “Xəmsə” şadlıq evində Basarkeçər rayon Daşkənd icmasının görüşü keçirilmişdir.

Tədbirdə əvvəlcə dövlət himni səsləndirildi, Ulu öndər Heydər Əliyevin və ölkəmizin ərazi bütövlüyü və suverenliyi uğrunda şəhidlik zirvəsinə ucalan Vətən övladlarının əziz xatirəsi bir dəqiqəlik sükutla yad edildi. Sonra böyük ekranda Göyçə mahalı haqqında Ulu öndər Heydər Əliyevin, Prezident İlham Əliyevin çıxışlarından ibarət videorolik nümayiş etdirildi.

Rəsmi hissəsinin aparıcısı Qorxmaz Tofiqoğlu Göyçə mahalının, eləcə də Daşkəndin tanınmış insanları, aşıqları, şairləri, ziyalıları haqqında danışaraq giriş nitqi söylədi. Göyçə mahalının mədəniyyətimizə Miskin Abdal, Ağ Aşıq, Aşıq Alı, Şair Məmmədhüseyn, Aşıq Ələsgər kimi dühalar bəxş etdiyini dilə gətirərək öncə sözü Qərbi Azərbaycan İcması idarə heyətinin sədri, milli məclisin deputatı Əziz Ələkbərliyə verdi.

Əziz müəllim öz çıxışında tədbir iştirakçılarını 9 May Qələbə günü və Ulu öndər Heydər Əliyevin doğum günü münasibətilə təbrik etdi. Əziz Ələkbərli düz bir il öncə – 21 may 2023-cü ildə Bərdə rayonunun Yeni Daşkənd kəndində olduğunu, 1953-cü ildə Daşkənddən deportasiya olunan 130 ailənin öz zəhmətləri hesabına sıfırdan qurub yaratdıqları, hətta Göyçədəki Daşkəndin adını da yaşatmaq üçün Yeni Daşkənd adlandırdıqları kəndin 70 illik yubileyində iştirak etdiyini vurğuladı. Natiq 1919-cu ildə ermənilər tərəfindən öldürülən Aşıq Nəcəfin ilk şəhidlərdən olduğunu qeyd edərək Göyçədəki tarixi hadisələrə diqqəti cəlb etdi. Daşkəndlilərin önəmli rolundan danışarkən Qərbi Azərbaycandan deportasiya olunan azərbaycanlılardan bəlkə də ayrıca kənd salanlardan yalnız Basarkeçər rayonunun Daşkənd kəndinin sakinləri olduğunu qeyd etdi. 24 dekabr 2022-ci ildə Prezident İlham Əliyevin Qərbi Azərbaycan İcmasındakı görüşündən, prezidentin həmin görüşdəki çıxışlarından sitatlar gətirərək camaatımızın tezliklər doğma yurdlarına dönəcəyi günün çox yaxında olduğunu demişdir.

Tədbirin aparıcısı Qorxmaz Tofiqoğlu növbəti sözü milli məclisin deputatı Sahib Alıyevə verdi. Sahib Alıyev Göyçə mahalının Aşağı Şorca kəndində doğulsa da, Daşkənd orta məktəbini bitirdiyini, ata və ana tərəfdən Daşkəndlə qohumluqlarını qeyd edərək Daşkəndlilərə xoş arzularını bildirdi.

Daha sonra tədbir iştirakçılarından milli məclisin deputatı Fatma Yıldırım, sabiq təhsil naziri Misir Mərdanov, iş adamı Rüstəm Dastanoğlu, əməkdar müəllim Əntiqə Cabbarova və başqaları da tez-tez Qərbi Azərbaycanlıların görüşlərinin keçirilməsindən, onların doğma yurdlara dönəcəklərinə inamlarının artıdığından danışdılar. Qeyd edək ki, tədbirdə Göycə-Dərələyəz üzrə koordinator İman müəllim, Basarkeçər rayon icma sədrinin müavinləri İlqar İsmayıl, Lütfiyar Nəsibov, Nərimanlı kənd icma sədri Şirazi İbrahimov və başqaları da iştirak edirdilər.

Tədbirdə Qərbi Azərbaycan İcmasının sədri Əziz Ələkbərli bir neçə Daşkənd sakinlərinə yeni üzvülük vəsiqələrini təqdim etdi. Bundan sonra aparıcı Daşkəndin tarixindən danışmaq üçün uzun müddət tarix müəllimi işləmiş Nazim Zeynalova söz verdi. O kəndin tarixindən xronoloji olaraq geniş məlumat verdi. Daha sonra söz tədqiqatçı-jurnalist Araz Yaquboğluna verildi. O kəndin ədəbi mühiti və alimləri haqqında ətraflı nitq söylədi. Araz Yaquboğlu nitqinin sonunda Daşkənd icma sədri Fəzair Piriyevə, eləcə də digər ziyalı və imkanlı şəxslərə üzünü tutaraq dedi: “Bu görüşləri belə geniş tərkibdə olmasa da, heç olmasa 3 aydan bir olmaqla mütəmadi keçirmək lazımdır. Ən azı bu gün böyüməkdə olan uşaqlarımız, gənclərimiz bir-birini yaxından tanıyar, bir-biriləri ilə sıx təmasda olarlar. Bu, bizim və kəndimizin tarixini yaşatmaq baxımından çox vacibdir. Biz kəndimiz haqqında bildiklərimizi onlara öyrətməli, onlar da gələcək nəsillərə ötürməlidir”.

Sonda Basarkeçər rayonu Daşkənd icma sədri Fəzair Piriyev çıxış edərək bu günə qədər gördükləri və qarşıda etmək istəyində olduqları işlərdən danışdı. O, Daşkənd kəndi haqqında saatlarla danışa biləcəyini, lakin tədbirin hələ bir neçə saat da davam edəcəyəni, saz, qara zurna, ifalar və rəqslər olacağını da nəzərə alaraq fikirlərini bitirmək istədiyini dedi. O icma üzvlərinin, xüsusən qadınların və gənclərin tədbirdə fəallıq göstərdikləri üçün onların hər birinə təşəkkürünü bildirdi.

Tədbirin ikinci hissəsi Aşıq Şakir, Aşıq Xanlar, Aşıq Firudin və başqalarının ifaları ilə davam etdi.

Goyce.az