AZƏRBAYCANI   POLŞADA   LƏYAQƏTLƏ   TƏMSİL   EDƏN   GƏNC  ZİYALIMIZ

Ziyalı - təpədən dırnağacan, qanına, iliyinəcən alicənab insan həmişə müxalifətdədir. Allahdan, Xalqdan və Dövlətçilikdən savayı hamıya və hər şeyə müxalifətdədir. Çox vədə elə, müxalifətin özünə müxalifətdədir və bu, heç də və qətiyyən onun iqtidar olmasına dəlalət eləmir. O, hər şeyin və hamının yaxşı olması, daha doğrusu - pislərin yaxşı, yaxşılarınsa daha yaxşı olması üçündür. Bəli, bu, uca Tanrının öz işıqlı və aqil bəndəsinin alnına əbədi həkk elədiyi qaibanə bir TALE YAZISIDIR.

Həyatın ən möhtəşəm möcüzəsi insan doğuluşudur. Körpə ana bətnindən xilas olan məqamda bu dünyadan aldığı ilk pay-əmanət nəfəsdir. Və onun bu İlahi nemət müqabilində dünyaya qaytarıb verdiyi səsdir. Deməli, nəfəs də, səs də Tanrı hədiyyəsi olduğu üçün müqəddəsdir. Söz isə bu iki müqəddəs hikmətin - Nəfəs və Səsin birləşməsindən yaranır və məhz elə buna görə də ikiqat müqəddəs sayılmalıdır. Biz bunu dərindən düşünüb anlasaq, heç vaxt dediyimiz və verdiyimiz sözə yalan qatıb xəyanət etmərik; bununla da biz çox əzab-əziyyət və günahlardan bilmənalı xilas olarıq.

Ziyalı insan əlbəttə ki, dünyanın istənilən mənzərəsində öz sözünü deməlidir. Zülmə, zülmkara, haqsızlığa, yalan və bədxahlığa qarşı haqq səsini qaldırmalıdır. Bunu etməyən, ya etmək istəməyən ziyalı, əslində, laldan daha artıq kordur. Mən həmişə dediyimi yenə də təkrar edirəm: ziyalı siyasiləşməməlidir. Ancaq bu qənaət heç vəchlə « ziyalı siyasətlə məşğul olmamalıdır » kimi qəbul edilməməlidir. Aydın insanların siyasətin, habelə siyasi qurumların fövqündə dayanması və siyasəti ziyalılaşdırmaq istəyi elə onların siyasəti olmalıdır. Çünki biz siyasəti müstəsna olaraq siyasilərin ixtiyarına verə bilmərik. Necə deyərlər, siyasət bir o qədər sadə məsələ deyil ki, onu ancaq siyasətçilərin öhdəsinə buraxasan!.. Bir sözlə, mövcud zaman kəsiyində, mövcud ictimai, sosial-siyasi və mənəvi-psixoloji durumda yaşayan ölkənin ziyalısı bu gün çox ağır, ağır olduğu qədər də şərəfli yükün altına girməyə, sadəcə, məhkumdur və bundan çəkinməməlidir. Neynəmək olar, bu da bir taledir!..

Cənablar, müəllimlər, bəylər!  Biz yığışıb dil tapa bilərik. Vallah-billah, dil tapa, bir-birimizi anlaya və anlada bilərik. Bu, göründüyü qədər də çətin bir iş deyil. Əslində, bunun üçün heç şərt-zad da lazım deyil. Bircə, səmimiyyət lazımdır. SƏMİMİYYƏT!

« Düz dayanmısansa, kölgənin əyri düşməyindən qorxma! ».

Bir də ona görə « dil tapa bilərik » deyirəm ki, səhv, xəta, günah ancaq və ancaq bir « cəbhədə »  deyil - hər ikisindədir. Məhz elə buna görə də bir çox məsələlərdə ortaq məxrəcə gəlmək daha asandır. Nə qədər təzadlı səslənsə də, bu, belədir; çünki günah (səhv, xəta, suç və qələt) ancaq birində, yəni mütləq şəkildə bir cinahda olsaydı, bu ixtilaflar da heç bu qədər uzanmazdı…

 Ən əsası isə, haqqında danışdığımız tərəflərin bir-birini « həzm » etməsi (əlbəttə, söhbət bir-birilərini çeynəyib-udub, həzm-rabedən keçirmək istəyindən getmir… Hərçənd, bəlkə də onların ən böyük arzuları elə budur), yaxınlaşması və millətin taleyüklü məsələlərində bir araya gəlməsi, özlərindən daha çox üçüncü tərəfə – XALQA lazımdır, özü də hava-su kimi.

İndi özünüz nəticə çıxarın: tərəzinin bir gözündə, bu barışmaz tərəflərin tragikomik ambisiyaları, digər gözündə isə, xalqın – Azərbaycan xalqının, bizim xalqımızın taleyidir!

…Hansı ağır gələr?

« Dünyada səmimi insan ünsiyyətindən qiymətli heç nə yoxdur » – işıqlı və dahi yazıçı Ekzüperinin cümləsi də nur saçır…
Bəli, əzizlərim, bu gün biz aramızda keçilməz divar ucaltmaq əvəzinə, körpü tikməliyik – mayası hörmətdən, məhəbbət və səmimiyyətdən yoğrulmuş ünsiyyət körpüsü!
Və biz bunu, « daldan atılan daş »a ehtiyac qalmasın deyə, bu gün etməliyik. Mütləq etməliyik!
Özgə çarəmiz yoxdur!..

   Bu gün Azərbaycanın ziyalıları arasında elə gənc və vətənpərvər şəxslər var ki, onların bugünkü ictimai fəaliyyəti çox əhəmiyyətlidir. Belə ziyalılardan biri də Polşada yaşayan Azərbaycanlı və Polşada yaşayan Azərbaycan gəncləri birliyinin sədri Cavid Zeynalovdur..

Cavid Zeynalov Polşada olduğu ilk gündən Azərbaycanın tarixi və mədəniyyəti barədə Polşa ictimaiyyətinə doğlun və vacib məlumatlar çatdırmağa çalışıb. Bu vətən qarşısında əsl xidmətdir. İllər ötəcək hətta əsrlər keçəcək, lakin Cavid Zeynalov və onun kimi gənc ziyalılarımızın bu qəbildən olan xidmətləri gələcək nəsillərimiz üçün faydalı olacaqdır. Bu gün Polşa vətəndaşı Azərbaycan həqiqətlərini Cavid kimi ləyaqətli ziyalılarımızdan eşidir. Özü də Cavid Zeynalov bütün bu fəaliyyətini yalnız və yalnız vətəndaşlıq borcu olaraq yerinə yetirir. Onun bu fəaliyyətində heç bir maddi maraq əsla yoxdur. Bu təmənnasız xidmətdir. Əsgərin vətənə etdiyi müqəddəs xidmət kimi.

UĞURLARIN NURLU SABAHLARLA DOLU OLSUN DƏYƏRLİ CAVİD ZEYNALOV!

Bünyamin Kazımov