Dəmir yumruğun memarı Heydər Əliyevdir

Bu gün Azərbaycan Respublikasının sabiq Prezidenti,  Ümummilli lider, görkəmli siyasi və dövlət xadimi Heydər Əliyevin doğum günüdü. Yaşasaydı, 98 yaşı tamam olardı.

18 ildir ki, Azərbaycan xalqı onun qurub yaratdığı ölkədə onsuz yaşayır.

Özü isə 1-ci Fəxri Xiyabanda uyuyur, Azərbaycanın ürəyi olan Bakıda…

Heydər Əliyev  1993-cü ilin yayında isə xalqın tələbi ilə doğulub boya-başa çatdığı Naxçıvandan Bakıya gəlmişdi. Düzdür, əvvəllər də bu şəhərdə yaşayırdı, ona doğma idi. Ali təhsilini Azərbaycan Dövlət Universitetinin tarix fakültəsində almışdı, 25 il Dövlət təhlükəsizliyi orqanlarında çalışmışdı, general-mayor rütbəsi almışdı, 13 il Azərbaycan SSR-yə rəhbərlik etmişdi, 5 il Moskvada SSRİ Nazirlər Soveti sədrinin birinci müavini vəzifəsində işləmişdi.

Harada işləməsindən asılı olmayaraq o, biliyini, gücünü xalqından əsirgəmir, onun iqtisadi inkişafına çalışır, hər məkandan siyasi dəstək verirdi.

Belə tarixi günlərdən biri 1990-cı ilin yanvarında Moskvada SSRİ rəhbərlərinin Bakıya qoşun yeritməsindən sonra baş verdi. Azərbaycan səfirliyinə gələrək bəyanat verdi və Qorbaçova kəskin etirazını bildirdi.

Həmin dövrlər Bakıda “yuva” quran və Moskvaya itaət edən “rəhbərlər”in ucbatından doğma şəhərində yaşaya bilmədi, Naxçıvana getdi.

Navçıvandan isə xalqın istəyi ilə 1993-cü ilin iyun ayında Bakıya gəldi,  vətəndaş müharibəsinin qarşısını aldı, elə həmin ilin oktyabrında Azərbaycanın 3-cü prezidenti seçildi.

1994-cü il sentyabrın 20-də Bakıda dünyanın 11 ən iri neft şirkəti ilə Əsrin Müqaviləsinin imzalanması mərasimində iştirak etdi və paralel olaraq milli ordu quruculuğuna başladı.

Heydər Əliyevin komandanlığı ilə düşmənə əks-zərbələr endirildikdən sonra bir sıra yaşayış məntəqələrimiz geri alındı və  ancaq işğalda olan torpaqlarımızın geri alınması üçün bu güc yetərli olmadı və 1994-cü ilin mayında məcburən atəşkəs imzalandı. Çünki tam qələbə üçün Azərbaycan iqtisadi cəhətdən güclü olmalı, ordusunu möhkəmləndirməli və müasir silahlarla təchiz etməli idi.

O missiyasını İlham Əliyev həyata keçirdi. İndi çoxları bu qələbənin qazanılmasında məhz Heydər Əliyevin uzaqgörən siyasətini əsas tutur.

Çünki ölkəmiz bölgədə iqtisadi layihələri gerçəkləşdirməsəydi, Ermənistanı bu layihələrdən kənarda qoymasaydı, Ordumuz yeni texnologi silahlarla təzhiz edilməzdi. Çünki bütün bunların alınması üçün əsas amil pul idi.

Ermənistan KTMT-nin və Avrasiya İqtisadi Birliyinin üzvü olsa da 2020-ci il sentyabrın 27-dən sonra döyüş meydanında tək qaldı.

Bu uğurlarımızın əsas memarı Heydər Əliyev və Ermənistana dəmur yumruq göstərən İlham Əliyev idi.

SSRİ dövründə 33, müstəqilliyimiz zamanı isə 77 adda mükafat, təltif və fəxri ad alan Heydər Əliyev Şuşamızın və işğalda olan torpaqlarımızın geri alınacağına bir an belə şübhə etmirdi, hər çıxışında bu mövzuya toxunurdu.

Hələ Azərbaycan rəhbəri seçilməmişdən əvvəl o, Şuşada ilk dəfə 1967-ci ildə olmuşdu. O vaxt Xankəndində azərbaycanlılarla ermənilər arasında baş verən münaqişəni araşdırmaq üçün Heydər Əliyev 15 gün burada  olmuş, Şuşaya da getmişdi. Şuşanı abadlaşdırmaq, tarixi abidələri qoruyub saxlamaq və böyük bir muzeyə çevirmək məhz Heydər Əliyevin adı ilə bağlıdır.

Heydər Əliyevin 1996-cı il mayın 6-da Prezident sarayında qaçqınlarla görüşdə Şuşanın və Qarabağın Azərbaycan üçün əhəmiyyətli olduğu haqda dediklərini ölkəmizdə hər kəs bilir:  “Şuşasız Qarabağ, Qarabağsız isə, ümumiyyətlə, Azərbaycan yoxdur”.

Şuşanı isə İlham Əliyev dəmir yumruğu ilə geri aldı. Və o xoşbəxt anı xalqı ilə bölüşmək üçün ötən il noyabrın 8-də Ümummilli liderin qəbrini ziyarət etdi, Şəhidlər Xiyabanına gəldi və çıxışında atasının vəsiyyətini yerinə yetirdiyini dilə gətirdi.

Azərbaycan xalqının xilaskarı, Azərbaycanı qalib xalq kimi dünyaya tanıtdıran İlham Əliyev atasının anadan olmasının 98-ci ildönümü münasibətilə “İnstagram”dakı  paylaşımında da Ulu öndərin Qarabağ haqqında dediyi fikirlərdən sitat gətirdi: “Şuşasız Qarabağ, Qarabağsız, ümumiyyətlə, Azərbaycan yoxdur”.

İndi Şuşaya görə Heydər Əliyevin ruhu rahatlıq tapıb. O rahatlığın memarı isə İlham Əliyevdir.

Ata vəsiyyətini yerinə yetirən oğul və igid ALİ BAŞ KOMANDAN!!!

İndi Heydər Əliyevin daha bir arzusu da çin olur, Şuşa yenidən qurulur, mədəniyyət mərkəzinə çevrilir.

Şuşanın may ayın 7-də mədəniyyət mərkəzi elan edilməsi ermənilərə əsl dəmir yumruq effekti verdi.

O yumruğun memarı isə Ulu öndərimiz Heydər Əliyevdir…

Şakir Göyüşov, “Qaraqoyunlu.com” xəbər portalının Baş direktoru