Onu anasının dolmuş gözlərində gördüm

Nədən Eltun Əliyev haqqında yazmaq istədim. Şəhid Eltunun babası babamgilin qonşusu olub. Tanış ünvan idi, haqqında nəsə yazmaq borcunda olduğumu hiss edirdim. II Qarabağ Vətən müharibəsi 30 ilin dərd-sərimizə məlhəm oldu. Doğrudur, müharibənin nə özü, nə də sözü məlhəm ola bilməz. Amma dərdimizin başqa əlacı yox idi. 44 günlük müharibə günlərində yüzlərlə, minlərlə Azəzrbaycan igidi adını milli tariximizə, Qarabağ tarixinə qızıl hərflərlə yazdılar. O, igidlərdən biri də Eltun Elnur oğlu Əliyevdir. Onun boya-başa çatdıran valideynləri – ailəsi ilə göröşüb söhbət etdim. Anasının dolmuş gözlərində oğlu Eltun Qəhrəman oğul kimi heykəlləşmişdi:

– Əsgəri xidmətə yola salanda hələ körpə olduğunu düşünürdüm. Əslində elə idi. Həyat, əsgərlik, sonra da döyüşlər balamı tez boya-başa çatdırıbmış. Cəbhə dostları onun haqqında danışdıqca oğlumun ucalmış boyunu, enli kürəyini gözümün önündə canlandırırdım. Əslində arıq, cılız bədəni vardı. Amma dostları onun haqqında danışdıqca elə bildim ki, əlimi uzatsam boyuna çatmaz. Amma dostlarının sözü ilə igid cüssəli sandığım oğlum şəhid olmuşdu, Vətən yolunda canını qurban vermişdi.

Atası Elnur bəy isə özünü zorla toxtaq tutmuşdu:

 Təbiətcə sakit olan Eltun döyüşlərdə böyük cəsarət, qəhrəmanlıqlar göstərib. Eltunun nəşini komandiri və döyüş yoldaşları gətirmişdilər. Komandiri dedi ki, Eltun arıq, balaca canı ilə düşmənə qan uddururdu. sərrast atışı hesabına Ordumuz hər dəfə xeyli irəliləyirdi. Mən də bundan böyük fəxr duydum. Doğrudur, valideyn üçün bala dağı ağırdır, amma Vətən sağ olsun, Eltun kimi şəhid oğullarımızın, qazilərimizin hesabına bu qara ləkəni millətin üstündən silə bildik.

Bəli, söhbətdən anladım ki, dəfn mərasimində Eltunun səngər yoldaşları da iştirak ediblər, onun şücaətindən ürəkdolusu ilə danışıblar. Ailənin də özünü təmkinli aparmasına, bir toxtaq görünmələrinə səbəb dostlarının son ana qədər onunla olması idi. Ata-ana, kiçik qardaş bir-birini dinləyə-dinləyə Eltundan danışırdılar, söhbət zamanı unutduqları, həm də eşitdikləri igidliyindən dönə-dönə danışırdılar. Birini hıçqırıq boğanda digəri sözü davam etdirirdi. Mən isə dinləyir, kiçik qeydlər edirdim, fikrimdə isə bütün şəhidlər dolanırdı, Eltun isə sanki lap öndə idi. Qardaşı Fərid isə bütün kövrək hisslərini boğub danışırdı:

Eltunla təkcə qardaş deyil, həm də dost-həmdərd idik. Onunla aramızda cəmi bir yaş fərqimiz olsa da, demək olar ki, mənə böyüklük edib. Hazırda yaşadığımız balaca evimizi də Eltun alıb. Evi dolandıran ancaq Eltun idi. Telefon dükanında satıcı işləyirdi. Anası dolmuş gözlərini qapıya sarı dikib yenə dilləndi: Oğlum, igid oğlum Eltun uşaqlıqdan zəhmətkeş olub. Sonuncu dəfə danışanda məndən halallıq istədi. Dedim, oğul, ancaq qələbə ilə geri dön. Mənə dedi ki, “sağ-salamat qayıdım, balaca evimizi qardaşımla birgə işləyib böyüdəcəyik”. Sözarası öyrəndim ki, Eltunun valideynlərinin səhhətləri narahat olduğundan, ailəni, demək olar ki, dolandıran Eltun imiş. Fərid bu məqam dilləndi ki, telefonla danışanda məndən də halallıq istəsə də sözünü yarımçıq kəsmişdim. Amma bir neçə gündən sonra şəhidlik xəbərini eşidəndə arxam-dayağımın yox olduğunu hiss etdim. Qardaşımın itkisi ağır olsa da, fəxr edirəm ki, mən şəhid Eltunun qardaşıyam. Haqqında bəhs olunan Şəhid Eltun Əliyevin tərcümeyi halına nəzər saldım:

O, 2001-ci il avqustun 29-da Sumqayıt şəhərində anadan olub. 2019-cu ildə Sumqayıt şəhəri 24 saylı orta məktəbində təhsil alıb. Elə həmin ilin payızında da həqiqi hərbi xidmətə çağırılıb. Eltun cəbhənin Tərtər istiqamətində yerləşən “N” saylı hərbi hissədə – ön xətdə baş atıcı olaraq xidmət edib. Sərrast atıcılığına görə onun şəkli hərbi hissədə şərəf lövhəsinə vurulmuşdur. Sentyabrın 27-dən II Qarabağ Vətən müharibəsinə qatılıb. Eltun ən şiddətli döyüşlərin getdiyi Füzuli, Cəbrayıl və Suqovuşanda vuruşub. Hamı kimi Eltunun da bir amalı olub - işğal altında olan torpaqlarımızı yağı düşmənin tapdağından azad etmək! 19 yaşlı gənc əsgər Eltun Əliyev oktyabrın 16-da Suqovuşan uğrunda döyüşdə şəhid olub, namərd düşmənin gülləsinə tuş gəlib.

Şəhadətin mübarək, əziz dost! Sənin üzünü görməsəm də, tanımasam da, qəhrəmanlığınla, göstərdiyin şücaətinlə səni bütün gəncliyimizin dostu sandım. Eltun Əliyev 2021-ci il oktyabrın 23-də Sumqayıt şəhərindəki Şəhidlər Xiyabanında dəfn edilib. Prezident İlham Əliyev dekabrın 15-də Azərbaycan Silahlı Qüvvələrinin bir qrup hərbi qulluqçusunun “Vətən uğrunda” medalı ilə təltif edilməsi haqqında sərəncam imzalayıb. Təltif olunanlar arasında Eltun Əliyev də var. Allah rəhmət eləsin! Babası Heydər Məşədi Cəlilin oğlu müəllim kimi yüzlərlə Vətən övladlarına dərs deyib. Vətən sağ olsun, müəllim baba!

Atilla Süleymanlı

“Respublika” qəzeti