"Turan eli"ndə Ramiz Rövşənlə...

Hər şey ondan başladı ki, mayın 25-də bir neçə qələm adamı ilə birlikdə ölkə prezidenti cənab İlham Əliyevin sərəncamı ilə xalqın şairi Ramiz Rövşən “xalq şairi” adına gec də olsa layiq görüldü. Bu fəxri adı alanlar arasında Musa Yaqubun və Ramiz Rövşənin oxucuları xüsusi sevinir, bu fəxri adı ədəbiyyatın, poeziyanın növbəti qələbəsi kimi qeyd edirdilər.

Ramiz Rövşənin sadiq oxucularından, tanınmış iş adamı, yazıçı dostum Rüstəm Dastanoğlu  neçə vaxt idi ki, xalqın şairi ilə  görüşümüzü planlasa da, şairin ağırtaxtalılığından vaxt uzanır, ya da başqa vacib bir iş çıxırdı. Hər dəfə bu “günahı” qismətin boynuna yükləyib, zamanı gözləyirdik. O zaman gəlib yetişdi; Ramiz Rövşən xalq şairi oldu. Çoxlarının, xüsusən Ramiz Rövşən poeziyasının pərvanələrinin səbrsizliklə gözlədiyi xəbəri oxuyanda Ramiz Rövşənlə şəxsi münasibətim olmadığından, şairin dostu kimi Rüstəm Dastanoğlunu zəng edib təbrik elədim. Bu sevinci dostlarla birlikdə bölüşmək üçün Ramiz Rövşənlə görüş ideyası da Rüstəm Dastanoğlundan gəldi. Rüstəm müəllimin irəli sürdüyü təşəbbüsü həmişəki kimi ilk öncə əziz dostumuz Vaqif  Namazov dəstəkləyib, təşkilatı işləri öz üzərinə  götürdü. Ramiz müəllim də görüşün vaxtının iyun ayının 11-ə təyin olunmasına razılaşdı. Beləcə, Novxanıda dəniz kənarında Turan eli İstirahət Mərkəzində Ramizsevərlər bir araya gəldilər. 

Görüş yerinə Ramiz Rövşəndən az sonra çatsam da, dünya şöhrətli akademik Rafiq Əliyev, görkəmli  rejissor Ramiz Həsənoğlu, Xalq artisti Xamis Muradov, yazıçı Yaşar, Orxan Fikrətoğlu, Rüstəm Dastanoğlu, Vaqif  Namazov, Elçin Musaoğlu, Nail-İmran Qurbanovlar və başqa tanımadığım bir neçə adam şairi dövrəyə alıb, həsbi-hal olurdular. Həmişəki kimi ustad yenə şux görünürdü. Amma şeytanın ayağını sındırıb ad alan şairin, nədənsə, bu dəfə öz ayağından gileylənirdi. Bu görüşün alınması üçün xüsusi fəallıq göstərən Vaqif Namazovun diqqətini hiss edən Ramiz Rövşən Vaqif müəllimin qoluna girərək ağır-ağır addımlarla çay süfrəsinə yön alır, köhnə tanışlarla çay süfrəsi ətrafında dünya ədəbiyyatından, Azərbaycan poeziyasından maraqlı söhbətlər edir, gahdan da Elçin Musaoğlunun, Orxan Fikrətoğlunun fikirlərinə özünəməxsus münasibət bildirirdi. Yeri gəlmişkən deyim ki, Ramiz Rövşənlə həmsöhbət olmağın xüsusi bir gözəlliyi var. Belə ki, O qarşısındakı müsahibini bəlağətli söhbətinin təsirinə salıb sehirləyə bilir. Təkcə savadlı, intellektual və istedadlı olmağına görə deyil bu, həm də qəlbindəki səmimiyyətinə, üzündəki işığa görədi. Böyük şairə diqqətlə qulaq asmağa çalışsam da, əyləşdiyimiz masada adamların çoxluğundan, görüşə təzə gələn tanışlarla tez-tez ayağa qalxıb görüşdüyümdən şairin söhbətlərini tam dinləyə bilmirəm. Yadımda o qaldı ki, şair Bibiliyanı -18, Quranı isə 28 yaşında Moskvada təhsil aldığı illərdə oxuduğunu bildirir,  Vaqif Səmədoğlu yaradıcılığındakı perqmetlərdən söhbət açıb mərhum şair dostundan sitatlar gətirdi.  Bu arada Təbrizdən gəlmiş qonağımız, “Dalğa” qurpunun rəhbəri Çingiz Mehtipur Amerkada yaşayan qardaşı İlhamla Ramiz Rövşəni tanış edib, şairin İranda fars dilində çap olunmuş kitabını şairin özünə təqdim edir.

Vaxtın uzandığını, Ramiz Rövşənin söhbətlərinin quzunu qurda verəcəyindən ehtiyatlanıb Rüstəm Dastanoğlu aparıcı üçün ayrılmış mikrofonu götürüb qonaqları salamlayır, görüşün hamı tərəfindən arzulandığını, xalq şairini fəxri ad alması münasibəti ilə təbrik edib, 30 il əvvəl Ramiz Rövşən haqqında yazdığı yazı ilə məclisə keçid alır. Yazını aramla dinləyən şair, razılığını üzündəki təbəssümlə bildirir. Rüstəm müəllimin aparıcılığı ilə başlayan görüşdə ilk söz Ramiz Rövşənin qardaşı, yazıçı-tərcüməçi Yaşara verilir. 

Ramiz Rövşən yaradıcılığına xüsusi diqqət ayırdığı üçün Rüstəm Dastanoğluna  təşəkkür edən yazıçı Yaşar, iş adamlarının bu cür nəcib işlərə dəstək olmağını ədəbiyyatın, poeziyanın təntənəsi kimi qəbul etdiyini bildirir. 

Daha sonra  söz alan istedadlı tele-jurnalist, yazıçı Orxan Fikrətoğlu Ramiz Rövşəni böyük şair, dəyərli ziyalı və ilk baş redaktoru kimi əhatəli xarakterizə edib, özünəməxsus yumoru ilə həmişə işə vaxtında gəlməməyi şairdən öyrəndiyini dilə gətirir. Zarafatqarışıq bu həqiqətlə Orxan Fikrətoğlu  məclis əhlini Ramiz Rövşənin görünməyən bir tərəfi ilə tanış edir.

Məclisin şirin yerində  dostumuz Ehtiram İlham Ramiz Rövşən şeirinin havasına  hamının diqqətini özünə yönəldir. Ard-arda dayanmadan 5-6 şeir deyir. Ehtiram İlhamın çıxışından ilhamlanan məhşur jurnalist, qiraətçi Kamil Məhərrəmoğlu öz bəlağətli çıxışı ilə bərabər Ramiz Rövşən poeziyasına da yer ayırır.

Tanınmış tele-jurnalist Qorxmaz Tofiqoğlunun ifasında “Qara paltarlı qadın” şeiri hiss olunurdu ki, Rafiq Əliyevin duyğularını yenə əsir alıb. Qorxmazın çıxışından sonra söz alan görkəmli akademik “Qara paltarlı qadın” şeirinin Ramiz Rövşən yaradıcılığının kulminasiya nöqtəsi olduğunu dilə gətirir. Akademik bu fikirinin Ramiz Rövşən tərəfindən ilk əvvəllər qəbul etmədiyini bildirsə də, sonra şairin özü akademik dostuna zəng edərək “Qara paltarlı qadın”ı Türkiyə parlamentində bir qurp qadının xorla oxuduqlarını və dostunun bu fikrinə təslim olduğunu bildirir.

Görüşdə şairin öz dilindən şeirlərini eşitmək istəyən oxucularının istəyini nəzərə alan Ramiz Rövşən  -  Səməd Vurğun,  Rəsul Rza,  Bəxtiyar Vahabzadə, Əli Kərim poeziyası haqqında yüksək fikir bildirdikdən sonra, öz əzəmətli poetik səsi ilə şeirlərinə meydan verir.

Şairi gurultu ilə alqışılayan tədbir iştirakçıları şairə öz suallarını ünvanlayırlar.

Xalq şairi yaradıcılığa orta məktəb illərindən başladığını, hətta 1957-ci ildə Azərbaycan Dövlət Televiziyasında Xalq artisti Ramiz Əzizbəylinin aparıcısı olduğu verlişdə şeir dediyini, orta məktəbdə "Ramiz Əliyev" imzası ilə məhşur uşaq şairi olduğunu bildirir.

Görüşün axırına yaxın şairin 30 illik dostu Qulu Məhərrəmli özünü yetirir. Bir az nəfəsini dərib məclis əhli ilə tanış olandan sonra Ramiz Rövşən haqqında o da öz yekdil fikirlərini geniş şəkildə bölüşür.

Tədbirin sonunda söz alan xalq şairi tədbirin təşəbbüskarı Rüstəm Dastanoğluna, görüşdə iştirak edənlərə öz təşəkkürünü bildirib, oxucuları ilə şəkil çəkdirməyə start verir. Beləcə, ustad Ramiz Rövşən  yazdığı şeirlərin əks-sədasını ona məhəbbətlə qaytaran oxucularının müşayəti ilə öz odasına tələsir...

      Qılman İman