Alqayıt Xəlilovun şeirləri

Qalıb yadımda

Nə müddətdir ayrılmışam Vətəndən,
Ana yurdun odu qalıb yadımda.
Tütək səsi, ağ sürülər, göy çəmən -
O günlərdən budur, qalıb yadimda.

Vurulmuşdum qıy səsinə qartalın,
Əsiriydim, hər yamacın, hər yalın.
Ağ lavaşın, kərə yağın, şan balın,
Qovurmanın dadı qalıb yadımda.

Alqayıdam, dərdim, qəmim bilinib,
Bağrım başı şan-şan olub, dəlinib.
Hər nə varsa, хəyalımdan silinib,
Bir o elin adı qalıb yadımda.

            XXX

Bir ana laylası, bir sənin laylan

Getdin, qayıtmadın, bu necə haldı?
Getdin, sevgimizin ömrü azaldı.
Getdin, ürəyimdə həsrətin qaldı,
Təbibdən, loğmandan betərmiş, inan,
Bir ana laylası, bir sənin laylan.

Endi qürublara günəşim erkən,
Aylı gecələrdə yox oldu kölgən.
Ruhuma qanaddı, fikrimə yelkən,
Bir tütək, bir nəğmə, bir tar, bir kaman,
Bir ana laylası, bir sənin laylan.

Eşqin bir ümmandı, kükrəyən çaydır,
Sənsiz sevincim də nalədir, vaydır.
Mənə təbiətin verdiyi paydır,
Ötür qulağımda hey zaman-zaman,
Bir ana laylası, bir sənin laylan.

Alqayıdam, yaman sarsıtdı məni,
Gözümdə dağların dumanı, çəni.
Nə qədər axtardım, aradım səni,
Oldu varlığıma nur saçıb yanan:
Bir ana laylası, bir sənin laylan.
                               1986-cı il Gəncə

         XXX

 Dəyməsin

Qızıl da, gümüş də gəldi-gedərdi,
Ulu xilqət qoy canıma dəyməsin.
Özü hifz eləsin şərdən, bəladan,
Şöhrətimə, ad-sanıma dəyməsin.

Nə ölüm dəhşətdir, nə də varsızlıq,
Ötəridir bəhrəsizlik, barsızlıq.
Xudpəsəndlik, qeyrətsizlik, arsızlıq,
Təkcə mənim ünvanıma dəyməsin.

Alqayıdam, nə altunam, nə zərəm,
Ləl yerinə həqiqəti gəzərəm.
Ürəyimi parçalasa, dözərəm,
Böhtan əli vicdanıma dəyməsin.

           XXX

Məndə qalıbdı

O dağları gözlərimə çəkmişəm,
Çəmənləri, düzü məndə qalıbdı.
İnciməsin nilufərim, bənövşəm,
Deyilməmiş sözü məndə qalıbdı.

Quzeylərə qar gəlmədi, gecikdi,
Baxçamıza bar gəlmədi, gecikdi,
Görüşümə yar gəlmədi, gecikdi,
Çiçəklərin yüzü məndə qalıbdı.

Kür taleyim, qəm atını minsə də,
İncimərəm dönük çıxsa, dönsə də.
Ana yurdun ocaqları sönsə də,
Odu məndə, közü məndə qalıbdı.

Xalqa inam gətirmişəm o yurdda,
Ömrü başa yetirmişəm o yurdda,
İlk eşqimi itirmişəm o yurdda,
Bir gözəlin gözü məndə qalıbdı.

Alqayıtam, vətən imiş gərəyim,
Namusum, qeyrətim, duzum, çörəyim.
Zirvələnib, dağa dönüb ürəyim,
O dağların özü məndə qalıbdı.

              XXX

Yenə Göyçədir

Dünya cənnət olsa başdan-ayağa,
Mənim qibləgahım yenə Göyçədir.
İmanım, məzhəbim, əqidəm, dinim,
Qızıl barigahım yenə Göyçədir.

Ana laylasında odur birincim,
Amalım, əqidəm, qəmim, sevincim.
Alınan sərvətim, satılan incim,
Xırd olan mətahım yenə Göyçədir.

Əksilsə başımdan dumanı, çəni,
Üfüqsüz sanaram ana Vətəni.
Bir ovuc torpağı kor etsə məni,
Demərəm, günahım yenə Göyçədir.

Həm gənclik qürurum, həm tale püşküm,
Ürəyi bədəndən ayırmaz heç kim.
Sivri daşlarında qalan ilk eşqim,
O ülvi siyahım yenə Göyçədir.

Nə müddətdi aranlıyam, dağlıyam,
Buz donduran nəfəsinə bağlıyam.
Mən onun övladı, onun oğluyam,
Axır səcdəgahım yenə Göyçədir.

Qürbət eldə bənzər olsam bir dağa,
Alqayıtam, istəmərəm, yox, qağa.
Bir ovuc torpağa, bir büküm ağa,
Ümidim, pənahım yenə Göyçədir.

        XXX

 Bir də o günlərim qayıda geri,

Bir də o günlərim qayıda geri,
Düzülə sürfəmə, ağ lavaş gələ.
Kalapır suyuna sarımsaq döyəm,
Kabab arxacınca, yağlı aş gələ.

Satlığa qoyublar əqli, məsləki,
Vicdan sükutdadır, susub hələ ki!
Doğma yuvasına kim istərdi ki,
Qonaq ürəyində min təlaş gələ?

Varlılar çobandır, kasıblar qoyun,
Mələyən deyilik, soydurun, soyun.
"Azadlıq" deyilən min cürə oyun-
Demədik, bu həyat ayaq-baş gələ.

Qanunlar dəyişdi, nökər oldu şah,
Mindir məmləkətdə, miliyondur günah.
İcazə vermədin, qoymadın, Allah,
Xanım süfrəsinə qaravaş gələ.

Nə vaxtdan yaranıb, görün bu əda:
Sərkədəsiz qoşun tez gedər bada!
İdrak davasında neyləyər gəda,
Kim görüb ocaqdan quru yaş gələ?

İran sərhədinə keçdi varımız,
Bir az qeyrətimiz, bir az arımız.
Mis-qalay daşıyır arvadlarımız
Əri yol gözləyir, arvad kaş gələ.

Diplomat, jurnalist getmir xaricə,
İnsan ləyaqəti alınmır vecə.
Hay--küylü otellər, qaranlıq gecə,
Qorxuram, qayıda döl faraş gələ!

Səngərdə yaralı, girov qalan var,
Qızılla, gümüşlə cibi dolan var,
Əsgər meyidindən rüşvət alan var,
Qorxun ki, göylərdən yağa, daş gələ!

Vətənim yaralı, elim mükəddər,
Bəxtim səksəkəli, dövranım hədər.
Alqayıdam, inanmazdım bu qədər,
Axa gözlərimdən qanlı yaş gələ .
                                        1992-ci il,