Firuz Göyçəsizin şeirləri

Göyçəsizi apar, çatdır Göyçəyə

Həsrət yüklü, bəxti qara karvanım,
Nə durmusan, hanı sənin sarvanın?!
Ata yurdun otuz ildi inləyir
Ya get, ya qal, gözlə ölüm fərmanın!

Gəmin batır, özün götür sükanı,
Aç yelkəni, Allah versin təkanı.
Qayıt geri, qaytar "Cənnət məkanı"
Bax ordadır, hər dərdinə dərmanın!

Sən qartalsan, bəsdi döndün sərçəyə,
Xəyalları döndər artıq gerçəyə!
Göyçəsizi apar, çatdır Göyçəyə
Dilək tutub, pirdə kəssin qurbanın!

Təxribatçı

Üz-gözündən zəhər daman,
ey özündən, razı məmur:
 Xirtdəyəcən su içində,
dörd tərəfin yağı düşmən,
üzüqoylu səngərlərdə
bircə gecə qalmısanmı?
Gözlə-qaşın arasında,
görmüsənmi durub əcəl?
Qəlpə, güllə başın üstə, 
kişnəyibmi "dəcəl-dəcəl"?
Qorxudanmı, soyuqdanmı 
sığınaraq qucağına bir 
xınalı gənc əsgərin gömgöy
olmuş dodağının 
əsməsini görmüsənmi?
Şəhid olan bir igidin 
qucaqlayıb torpağını 
şəhadətə çatdı deyə 
gülümsəyib, əbədiyyən 
susmasını görmüsənmi?
Heç olubmu, əzizlərin,
yaxınların arasında şəhid olan, 
qazi olan? 
Yana-yana fəryad edib 
saçlarını yolublarmı
bacın, anan?
Boynubükük atan sənin 
için-için ağlayıbmı?
Qardaşların dizi yerdə, 
qəbir üstdə baş əyibmi, dayanıbmı?
- Əlbəttə, yox!!!
Nə haqqın var, söylə onda, 
şəhid ata-anasını 
əzdirirsən, sındırırsan?
Yüz bəhanə, fırıldaqla
"büdcədə pul yoxdur" deyib,
qaziləri qandırırsan...
Rəislərin qarşısında 
yaltaqlanıb, quyruq qısıb 
baş əyirsən.
Zəifləri təhqir edib, hədyan-
hədyan söz deyirsən...
Haram olsun bu Vətənin 
havasından udduqların...
Haram olsun bu torpağın 
sərvətindən çaldıqların..
Ey milləti bir-birinə 
qarşı qoyan tülküsifət
mövhumatçı, 
Dövlətimin uğuruna 
kölgə salan
təxribatçı...

Bu dünyanı bəyənməzdi xəyallarım

Bir zamanlar iç dünyama sığışmazdı,
Bu dünyanı bəyənməzdi xəyallarım.
Qanadlanar asimana, ulduzlara
Qərar tutub, dayanmazdı xəyallarım.

Saflıq vardı, paklıq vardı mayasında,
Haqq-ədalət, insaf vardı ziyasında.
Tikmək vardı, qurmaq vardı röyasında
Boş-boşuna öyünməzdi xəyallarım.

Xoşbəxt günlər yaşayırkən təxəyyülüm,
Əliyalın ellərimə gəldi zülüm!
Əgər Sevan olmasaydı Göyçə gölüm 
Əsla, qara geyinməzdi xəyallarım.

Ağqulaqlı şeytanların müti qulu,
Sahibinə arxalanıb, azdı yolu.
Viran qoyub, yıxmasaydı sağı, solu
Al qanına boyanmazdı xəyallarım.

Dərbənd rusa, Təbriz farsa oldu kölə,
Borçalını ağlatdılar gülə-gülə!
Qarabağım dönməsəydi yanıb külə
İntiqamçün "deyinməzdi" xəyallarım.

İndi dəlil-sübutum var, əsasım var,
Vətən adlı parçalanmış  atlasım var,
Göyçəsizəm, çox amansız qisasım var
Bu amaldan yayınmazdı xəyallarım.

Qardaş, mənə "şair" demə

Utanıram mən bu addan,
Qardaş, mənə "şair" demə!
Şair sözü el sözüdür,
Qardaş, mənə "şair" demə!

Nizamiyə yamaq vurub,
Füzuliyə divan qurub.
Nəsiminin belin qırıb
Qardaş, mənə "şair" demə!

Şairəmsə, Şəhriyar kim?
Əhməd Cavad, Bəxtiyar kim?
Sürgün olmuş ixtiyar* kim?
Qardaş, mənə "şair" demə!

Sücaətin əli əsər,
Məmməd Araz cəza kəsər.
Şiruyənin zəri küsər
Qardaş, mənə şair demə!

Miskin Abdal haray salar,
Alı, İman məttəl qalar.
Ələsgərdən ayıb olar
Qardaş, mənə "şair" demə!

Mənə "Firuz Göyçəsiz" de,
"Yurd-yuvasız, kimsəsiz" de,
"Dərdi böyük, çarəsiz" de,
Qardaş, mənə "şair" demə!

• Hüseyn Cavid

Oğruya, quldura çalışır kasıb 

Yorğun-arğın nimdaş, yırtıq başmaqda, 
Yamaqlı şalvarda dolaşır kasıb.
Bir qarın çörəkçün sübhdən axşama,
Palçığa, çamıra bulaşır kasıb.

Əlinin qabarı, alnının təri,
Əritmir, yumşaltmır daş ürəkləri!
Haqqını çalırlar pul hərisləri
Oğruya, quldura çalışır kasıb .

Ey nəfsə kölələr, bilin, siz bunu:
İştahla yemənin qəhərdi sonu!
Zamanın asisi etməyin onu,
Gecələr qədərlə dalaşır kasıb.

Göyçəsiz, bir düşün sən də əməlli,
O qədər müşkülmü bu işin həlli?
Qeyb ola kasıblıq yerli, təməlli
Yoxsa mütiliyə alışır kasıb.

Lalə

Neynəyirsən bu daşların,
Arasında bitib, lalə?!
Gözəlliyin öz yerində,
Yaddaşınmı itib, lalə?!

Söylə, hanı, tacın, taxtın?
Tapdaq altda keçir vaxtın.
Mənim kimi yoxsa baxtın
Otuz ildir yatıb, lalə?!

Tutulmusan nə azara,
Yaylaq hara, şəhər hara...
Qoydularmı de, qumara
Ləçəyindən tutub, lalə?!

Məndə də var o xallardan,
Məndə keçdim bu yollardan.
Məhrum oldum xəyallardan
Yaşıma yaş qatıb, lalə!

Göyçəsizi dinlə barı,
Həyat qısa, ömür yarı.
Unut dağı, unut qarı
Tale bizi atıb, lalə!