Nazilə Gültacın şeirləri

 Nazilə Gültac – həkim, şair. İxtisasca terapevtdir. AYB- nin üzvüdür, Prezident təqaüdçüsüdür.

 “Suya yazılan sevda”, Yaşıl pıçıltı”, “ Qəlbdən dodağa”, “Ben Gönlümü bilmezmiyim”? “ Sevgi yağmuru” ( Türkiyə) şeirlər kitabının müəlifidir. Şeir və hekayələri vaxtaşırı yerli və xarici mətbuatlarda dərc olunur. Bir çox almanaxlarda çap olunmuşdur. 

  Qardaş Türkiyədə dəfələrlə şeir şölənlərində iştirak etmişdir. Azərbaycan- Türkiyə ədəbi əlaqələrinin inkişafında xidmətlər göstərir.Qardaş ölkənin yazarlarının bir çoxunun şeir və hekayələrini bizim türkcəmizə uyğunlaşdırıb, çap etdirmiş, onların Azərbaycanda səfərini təşkil etmiş, möhtəşəm tədbirlərə imza atmışdır. Hal-hazırda Azərbaycanın bir çox yazıçı və şairlərindən ədəbi nümunələr çevirərərək, Türkiyənin tanınmış  şairi Coşkun Karabulutla bərabər Türkiyədə yayımlanmasına və tədbirlər keçirilməsinə ortaq proqramlar hazırlayır.

Bakı şəhərində yaşayır. İki övladı var.

 MƏN  HƏKİMƏM

İnsan oğlunun

üzündəki əzabları

oxuyuram.

Acısını,  ağrısını

öz canımda

duyuram.

Bir qəmli göz  görəndə

göz yaşımı gizlədib

güldürürəm dərdini.

Canından can ayrılana,

qan verirəm qanımdan.

Ağ xalatın işığından

aydınlanır qaranlıqlar.

Mən şam kimi əriyirəm.

Kimsə bilməz  nə çəkirəm,

Iztirabdan, ağrılardan

sızıldayan ürəklərdən

xallar düşür ürəyimə.

Sağalmayan

yaralara

bir məlhəməm.

Mən həkiməm.

    XXX

VƏTƏN XƏRİTƏSİ

Qızım çəkdi

Vətən  xəritəsini.

Azərbaycan sözünü

yerləşdirə bilmədi,

xəritənin üstünə.

“Azər “ yazdı,

“ Bay” yazdı,

 Dedi ki,

” Can “sözünə  

yer  azdı.

Məndən

yardım istədi.

Baxdım xeyli

ana yurdun

paralanmış köksünə,

dağ çəkilən səddinə.

Dəmirqapı Dərbəndin

qapısını döymədim.

“C”-nı cənuba yazdım,

dedim canımız orda.

Qızım çoxumuz orda. 

“A” qondu Borçalıya,

and yerimizdi dedim.

“N”-nı qərbinə yazdım.

İrəvana xal saldım

Orda  nidamız qalıb,

Orda  naləmiz yanıb.

Qızım indi bax , dedim:

Böyük  Vətənimizin 

bəxtsiz xəritəsinə.

Bəxtsiz Vətənimizin

böyük xəritəsinə!

XXX                                                                                                  

MƏN ASILDIM ÜRƏYİMDƏN

Yazı  yazan,

nə yazmısan belə sən?

Hər yazılan

yazılırmı görəsən?

Bəxtimiz alnımıza,

sevgimiz sinəmizə

yazılıb.

Ürəyimə yazılan

alnıma yazılmadı.

Başımızı qoruyub,

sinəmizi veririk,

taleyin gülləsinə.

Yazı yazan,

nədən yazdın belə sən?

Eşq dərgahı ürək imiş,   

mən asıldım ürəyimdən.

XXX

DAŞ KİMİ

Payız dumanından nəm çəkən tale,

Durna lələyiylə ayrılıq yazdı.

Payız gümanına bürünən tale,

Qərib durna kimi yolunu azdı.

Kor olan bir bəxtin tutub əlindən,

Gəzirəm payızla, qış arasında.

Yanan ürəyimin səni gəzərkən,

Ölümü göz ilə qaş arasında.

Bəzən bütöv ömür olur gərəksiz,

Günlər axıb gedir, gözdə yaş kimi.

Yaşamaq olurmuş, inan, ürəksiz,

Yaşamaq olurmuş, qara daş kimi.

XXX

EY ADAM

Ayağımı qoymağa,

addım  atmağa,

gəzməyə,

düşünməyə

yer tapıram.

Əlimi uzatsam

 tutmağa bir əl,

arzularımı

asmağa budaq,   

ürək sözümü

yazmağa

yarpaq  tapıram.

Uçmağa göy üzü,

Yaşamağa

torpaq çoxdu.   

Təkcə qəlbimə

yer yoxdu.                                                                

Ey adam.

XXX

QUYU

Adəm oğlu, insan

Yer üzündə

axtardığını tapmayanda

quyu qazdı, zaman-zaman.

Dibi bilinməz, suyu  görünməz.

Qaranlıq yaşatdı orda.

Gündə bir haqq asıldı,

bir işıq boğuldu,

hər qazılan quyuda...

İlk quyunu kim qazdı,

kimlər keçdi,

bu quyunun gözündən?

İçimdə bir quyu var,

diri yalanlara məzar.

XXX

QƏRİBƏM, AY ANA

Bəxtim gedib çox uzağa,

Qapı  açıb ayrılığa,

Ahım çatmır daha dağa,

Qəribəm, ay ana, qəribəm.

Könlüm bilmir yuva nədir,

Ruhum dəli, divanədir.          

Qərib kəfən gor istəmir,

Qəribəm, ay ana,  qəribəm. 

Bu dünyanın  qibləsi bir,

Bu dünyanın çox daşı pir.

Olumu, ölümü  də bir,

Qəribəm, ay ana, qəribəm.

Həyat  burda  seçimdədir,

Köç edənlər köçündədir,

Qürbət mənim içimdədir.

Qəribəm, ay ana, qəribəm.

XXX

SUYA  YAZILAN  SEVDA

Şerim  suya  yazılıb:

Könlümdən  başlayıb

axır  üzü  çaylara.

Çiçəklərin  üzündə

kövrəlir damla –damla.  

Şeirim   sabaha  yazılıb:

Ürəyim  üfüqündə.

Çıpınır  sinəsində

bəxtimin  saatları.

Döşənir  ayağına

gecənin  ulduzları.

Şeirim  sevdaya  yazılıb:

Bələnib  ay  işığına.

Bu  sevda  nə  sənə,

nə  mənə.

Bu  sevda  suya  yazılıb.

XXX

YOLLAR

Ürəyimə    

gələn   yolla.

Ürəyinə

gedən  yolun

yol ayrıcında 

dayanmışam,

əllərim  qoynumda.

Gözlərindən   ürəyimə 

gələn  yola

dəstə-dəstə  gül  ələnir.

Ürəyinə  gedən  yolda     

ümidlərim güllənir.

Gözlərimdən  ürəyimə

gələn  yolu

dolu  döyür,

sel ələnir

Bu  yolların sonu gəlib.

göz yaşında nöqtələnir.

XXX

GÖRÜN   GEDİM

Gəldim, səni görüm gedim,

Gözlərimə görün gedim.

Tellərimi köksün üstə

bircə- bircə sərim, gedim.

Məni sənin bilib gəldim.

Göz yaşımı silib gəldim,

Ayrılığa gülüb gəldim,

İcazə ver, gəlim-gedim.

 Bu Gültacın varı sənsən,

 Yarı özü, yarı sənsən.

 Eşq bağının barı sənsən,

 Qoy barımdan dərim, gedim.

XXX

SƏN  YAŞAYAN

Sən yaşayan şəhərdən

gedəcəkdim,

Gedə bilmirəm daha.

Havasında sevgi qoxusu.

Sən olmayan yerdə

 necə yaşamaq qorxusu.                        

Ömrümə  yagmursuz günsən,

Ömrümdən hara gedim?     

Ömürdən o yana sən yoxsan.

Pis goz önündədi hər an.

Yaxşını tapmaq çətin.

Buranın daşı da, çiçəyi də

mənə səndən danışır.

Ömrüm- günüm-

bu şəhərdən necə gedim?-

Bu şəhərdə bir sevgi yaşayır.

XXX

AMANDI, AY GEDƏN, ƏYLƏN

Mizrab asta- asta sinəmdə gəzir,

Yollar gedər- gəlməz, ay gedən, əylən,

Səni üzən nə var, məni də üzür,

Amandı, amandı, ay gedən, əylən.

Bağrı xal lalələr bu yurdda bitir,

Yarımçıq sevdalar  yollarda itir,

Getdiyin yolları yığ, geri gətir,

Amandı, amandı, ay gedən, əylən.

Ətir desən, ətir bizim güllərdə,

Nəğmə desən, nəğmə bizim dillərdə,

Sevda desən, sevda bizim ellərdə,

Amandı, amandı, ay gedən, əylən.

Gültac istəyir ki, solmasın güllər,

Sevda nəğməsini oxusun,  dillər,

Sözün işığına yığılır ellər,

Amandı, amandı, ay gedən, əylən.

XXX

Dünyam yaman təlatümdə-

Dünyamın havası çatmır.

Çarmıxa çəkiblər

duyğularımı.

Asılıb gözümdən

saxta sifətlər.

Qəlbimin qapısını

qara yellər qoparıb,

içində sellər oynayır.

Ha üzsəm də ,

 sahilimə çıxammıram,

əllərimdən yağış damır...