“Qayıdış hüququ” mövzusunda dəyirmi masa və eyniadlı kitabın təqdimatı olub - FOTOLAR

İyunun 2-də “Qayıdış hüququ” mövzusunda dəyirmi masa və sənətşünaslıq üzrə fəlsəfə doktoru Qalib Qasımovun eyniadlı kitabının təqdimatı keçirilib.

Goyce.az xəbər verir ki, tədbiri giriş sözü ilə açan AMEA-nın müxbir üzvü, professor Misir Mərdanov mövzunun aktuallığını vurğulayaraq, dünyada milyonlarla insanın məcburi köçkünlük problemi ilə üzləşdiyini bildirib. Azərbaycan xalqı da ötən əsrdə müxtəlif deportasiya və məcburi köçürülmə siyasətlərinin təsirinə məruz qalıb, nəticədə yüzminlərlə azərbaycanlı öz doğma yurdlarını tərk etməyə məcbur olub. O qeyd edib ki, bu problemlərin həlli beynəlxalq hüququn norma və prinsipləri, eləcə də beynəlxalq ictimaiyyətin birgə səyləri çərçivəsində mümkündür.

Misir Mərdanov Ulu Öndər Heydər Əliyevin indiki Ermənistan ərazisindən zorla çıxarılmış azərbaycanlıların qayıdış hüququ ilə bağlı fikirlərini xatırladaraq, Prezident İlham Əliyevin də bu məsələni daim diqqətdə saxladığını və bunun insanlarda qayıdış perspektivlərinə inam yaratdığını bildirib.

O vurğulayıb ki, tədbirin məqsədi Azərbaycan xalqının müxtəlif dövrlərdə məruz qaldığı zorla yerindən edilmə halları ilə bağlı tarixi və hüquqi həqiqətlərin ictimaiyyətə çatdırılması, qayıdış hüququ və məcburi köçkünlük problemləri ətrafında fikir mübadiləsinin aparılması, habelə ictimai-hüquqi məlumatlılığın artırılmasıdır. Qeyd olunub ki, Qalib Qasımovun “Qayıdış hüququ” kitabı Azərbaycanda bu mövzuya həsr olunmuş ilk nəşrlərdən biridir.

Milli Məclisin deputatı Qaya Məmmədov çıxışında qayıdış hüququ ilə bağlı dəyirmi masanın və kitabın əhəmiyyətindən danışıb. O bildirib ki, Qayıdış Konsepsiyasının əsas prinsipləri Heydər Əliyevin qaçqınlar məsələsinə dair baxışları əsasında formalaşıb və beynəlxalq hüququn norma və prinsiplərinə uyğundur. Deputat qeyd edib ki, qayıdış hüququ beynəlxalq insan hüquqları və humanitar hüquq çərçivəsində tanınan fundamental hüquqlardandır və Azərbaycanın bu məsələyə yanaşması sülh gündəliyinə, insan hüquqlarının müdafiəsinə əsaslanır.

Hüquq elmləri doktoru, professor Zahid Cəfərov bildirib ki, Azərbaycan və ingilis dillərində nəşr olunan kitabda indiki Ermənistan ərazisindən zorla çıxarılmış azərbaycanlıların qayıdış hüququnun tarixi, hüquqi və siyasi aspektləri geniş təhlil edilir. Nəşrdə qayıdış hüququ beynəlxalq humanitar hüquq, qaçqın hüququ və insan hüquqları kontekstində araşdırılır.

Tədbirdə hüquqşünas Rəvan Həsənov, Milli Məclisin deputatı Sahib Alıyev, professor Elxan Hüseynov, tarixçilər Nazim Mustafa və Cəbi Bəhramov, fəlsəfə üzrə fəlsəfə doktoru Etibar Əliyev, “Vətəndaşların Sosial Rifahı Naminə” İctimai Birliyinin sədri İradə Rizazadə və sahibkar Fərid Abdullayev də çıxış edərək mövzu ətrafında fikir mübadiləsi aparıblar.

Çıxışlarda qayıdış hüququnun beynəlxalq hüquqdakı yeri, bu sahədə mövcud presedentlər, qaçqın və məcburi köçkünlərlə bağlı hüquqi mexanizmlər, həmçinin insan hüquqlarının müdafiəsi istiqamətində beynəlxalq təcrübə müzakirə olunub.

Tədbirin sonunda kitabın müəllifi və dəyirmi masanın təşkilatçısı Qalib Qasımov iştirakçılara təşəkkür edib və Prezident İlham Əliyevin siyasəti nəticəsində Qərbi azərbaycanlıların öz doğma yurdlarına qayıdacağına inamını ifadə edib.

Qeyd edək ki, “Qayıdış hüququ” kitabı “Azərbaycan-Türkiyə Evi” İctimai Birliyinin maliyyə dəstəyi ilə nəşr olunub. Kitabın siyasi məsləhətçisi professor Misir Mərdanov, elmi məsləhətçisi professor Zahid Cəfərov, rəyçiləri professorlar Ramin Quraqurbanlı və Əfsər Sadıqov, hüquqşünaslar Rəvan Həsənov və Seymur Yusifli, “Ön söz” müəllifi isə Mərmərə Universitetinin professoru Dr. Okan Yeşilotdur.