Daşkənd sakini Ağababa Qəmbərəli oğlu İsgəndərovun anadan olmasının 100 illik yubileyində Araz Yaquboğlunun çıxışının tam MƏTNİ

Salam, çox hörmətli yubiley iştirakçıları, qonaqlar və həmkəndlilərim!

Sizləri növbəti dəfə birlikdə görməkdən çox şadam!
Bu günkü çıxışımda sizlərə 100 yaşlı İkinci Dünya müharibəsi veteranı, Daşkənd sakini Ağababa Qəmbərəli oğlu İsgəndərovun həyat və fəaliyyəti haqqında danışmaq istərdim.
Ağababa İsgəndərov 1926-cı ildə Göyçə mahalının Basarkeçər rayonunun Daşkənd kəndində Nəsiblilər nəslində anadan olmuşdur. 1941-ci ildə Daşkənd kənd orta məktəbinin yeddinci sinifini bitirmiş və Basarkeçərdə altı aylıq traktor sürücülüyü kursunda oxumuşdur.
1944-cü ildə Daşkənd kəndindən sonuncu müharibəyə səfərbər edilən 1926-cı il təvəllüdlü 18 nəfər çağırışçıdan biri də Ağababa İsgəndərov olmuşdur.

O, 26 noyabr 1944-cü ildə Basarkeçər RHK-ğı tərəfindən Böyük Vətən müharibəsinə səfərbər edilmiş, Gürcüstanın Qori şəhərində üç ay hərbi təlim keçdikdən sonra Leninqrad vilayətinə göndərilmiş, burada artilleriya üzrə qısamüddətli kurs keçərək topçu kimi ön cəbhədə döyüşlərə qatılmışdır. Ukrayna, Estoniya, Polşa və Almaniyada əvvəlcə 1166-cı atıcı alayın, sonralar isə 416-cı Taqanroq diviziyasının tərkibində döyüşlərdə iştirak etmişdir.
2 may 1945-ci ildə Berlin döyüşlərində qolundan və sol ayağından yaralanmışdır. On dörd ay xəstəxanada müalicə olunduqdan sonra ordu sıralarından tərxis edilərək 1946-cı ildə doğulduğu Göyçə mahalının Daşkənd kəndinə qayıtmışdır.
Ağababa İsgəndərov müharibə veteranı kimi otuza qədər orden və medallarla təltif olunmuşdur. Orden və medalların adlarını sadalamaqla vaxtınızı almaq istəməzdim. Əlavə olaraq qeyd edim ki, 2016-cı ildə Ağababa İsgəndərova dövlət tərəfindən mənzil və minik avtomobili hədiyyə edilmişdir.

Hörmətli tədbir iştirakçıları!

1953-cü ildə Göyçə mahalından azərbaycanlılar departasiya olunarkən Ağababa İsgəndərov da öz ailəsi ilə birlikdə Şəmkirin Dağ Tatarı kəndinə köçməli olmuşdur. Lakin, 25 yaşında olan özündən kiçik qardaşı Yaqubu ildırım vurduqdan sonra Şəmkir rayonunda yaşaya bilməmiş və təxminən 1954-cü ildə yenidən doğma Daşkənd kəndinə qayıtmışdır.

Ağababa İsgəndərov Daşkəndin “Qırmızı Rəncbər” kolxozunda müxtəlif işlərdə çalışmış, qoyunçuluq fermasında işləmişdir. O, həm də yaxşı əl qabiliyyəti olan rəngsaz kimi Daşkəndlilərin evlərinin təmir olunub rənglənməsində də usta kimi fəaliyyət göstərmişdir.

Çox hörmətli yubiley iştirakçıları!

Sizlərə bildirmək istərdim ki, Ağababa İsgəndərov “Coşqun” təxəllüsü ilə şeirlər də yazır. O, ilk şeirini Almaniyanın Berlin şəhərində müalicə olunarkən yazmışdır. Yaradıcılığı əsasən aşıq şeirinə xas olan qoşmalar, gəraylılar, dini şeirlər, nohələr və tərənnüm-ithaflardan ibarətdir. Şeirləri təvazökarlıqdan uzaq olsa da deməliyəm ki, daha çox mənim 2008-ci ildə Azərbaycan Milli Elmlər Akademiyası Folklor İnstitutu Elmi Şurasının qərarı ilə çap olunan “Dаşkənd aşıqlаrı və şаirləri” kitabında və 2005-ci ildə çap olunan “Şəmkir şairləri və aşıqları” kitabında nəşr edilmişdir. Bundan başqa, 1972-ci ildə Bərdə rayonunun Yeni Daşkənd kəndində keçirilən Aşıq Ələsgərin 150 illik yubileyi mərasimində onun yazdığı “Ələsgər” rədifli şeir Bərdənin “Kommunizm yolu” qəzetində və 2013-cü ildə “Ozan dünyası” jurnalında çap olunmuşdur.
İti yaddaşı, dərin hafizəsi olan 100 yaşlı Ağababa İsgəndərovu yubileyi münasibətilə səmimi qəlbdən təbrik edir və ona cansağlığı diləməklə belə uzunömürlü yaşamağın sizlərə də nəsib olmasını Uca Allahdan arzu edirəm.
Diqqətiniz üçün çox sağ olun. Hər birinizə ayrı-ayrılıqda təşəkkür edirəm.

Araz Yaquboğlu
tədqiqatçı-jurnalist,
Azərbaycan Jurnalistlər Birliyinin və
Azərbaycan Aşıqlar Birliyinin üzvü