Professor İbadulla Ağayevin 75 illik yubileyinə həsr olunmuş təntənəli tədbir keçirilib

Dədə Ələsgər Ocağı İctimai Birliyinin təşkilatçılığı ilə Rəşid Behbudov adına Azərbaycan Dövlət Mahnı Teatrında görkəmli alim, əməkdar elm xadimi, əməkdar müəllim, tibb elmləri doktoru, professor İbadulla Ağayevin 75 illik yubileyinə həsr olunmuş təntənəli tədbir keçirilmişdir.
Yubiley gecəsində elm və səhiyyə ictimaiyyətinin tanınmış nümayəndələri, ziyalılar, dövlət qurumlarının təmsilçiləri, mədəniyyət və ədəbiyyat xadimləri iştirak etmişdir.

Goyce.az xəbər verir ki, tədbir aparıcı Könül Həbibqızının salamlama nitqi və Vətən uğrunda canlarını fəda etmiş şəhidlərin xatirəsinin ehtiramla yad edilməsi ilə başlamışdır. Ardınca professor İbadulla Ağayevin zəngin həyat və elmi fəaliyyətinə həsr olunmuş videoçarx nümayiş etdirilmişdir.
Açılış nitqi ilə çıxış edən “Dədə Ələsgər Ocağı” İctimai Birliyinin sədri Xətai Ələsgərli professor İbadulla Ağayevin təkcə tibb elminə deyil, həm də milli-mənəvi dəyərlərimizin qorunması və təbliğinə verdiyi töhfələri xüsusi vurğulamışdır. Professor İbadulla Ağayevin Dədə Ələsgərə olan sonsuz sevgisini xüsusilə qeyd etmişdir.

Daha sonra yubilyar professor İbadulla Ağayev çıxış edərək tədbirin təşkilatçısı olan “Dədə Ələsgər Ocağı” İctimai Birliyinə və iştirakçılara minnətdarlığını bildirmişdir. Uzun illər davam edən elmi və pedaqoji fəaliyyətinin əsas məqsədinin Azərbaycan səhiyyəsinə fayda vermək olduğunu vurğulamışdır. Professor İbadulla Ağayev həyat yolunda qarşılaşdığı çətinliklərdən, qazandığı təcrübələrdən və bu gün gördüyü mənəvi dəstəyin onun üçün böyük dəyər daşıdığını xüsusi minnətdarlıq hissi ilə ifadə etmişdir.

Tədbirdə Sabirabad Rayon İcra Hakimiyyəti başçısının birinci müavini Həsən Həsənov, Azərbaycan Tibb Universitetinin professoru, şair Paşa Qəlbinur, ATU-nun onkologiya kafedrasının dosenti Nəsimi Qasımov, daxili xəstəliklər kafedrasının dosenti, tibb və filologiya üzrə fəlsəfə doktoru Nağdəli Zamanov, Türk Ağsaqqalları Birliyinin sədri, tibb elmləri doktoru, professor Sudeyf İmamverdiyev, tibb elmləri doktoru, professor Fatma Hacıyeva, professor Hacı Xalid Bəşər, şair Yusif Ağbulaqlı, şair-publisist Məlahət İsmayılqızı çıxış edərək professor İbadulla Ağayevin elmi, pedaqoji və ictimai fəaliyyətindən söz açmışlar. Yarım əsri əhatə edən elmi və pedaqoji fəaliyyət yolunu yüksək dəyərləndirmiş, onun epidemiologiya elminin inkişafına verdiyi fundamental töhfələrdən, yoluxucu xəstəliklərin öyrənilməsi və profilaktikası sahəsində apardığı sanballı tədqiqatlardan geniş bəhs etmişlər. Bildirilmişdir ki, professor İbadulla Ağayev təkcə görkəmli alim deyil, eyni zamanda onlarla gənc tədqiqatçının formalaşmasında mühüm rol oynamış fədakar müəllim, elmi məktəb yaradan ziyalıdır. Çıxışlarda onun respublika səhiyyə sistemində uzun illər ərzində tutduğu məsul vəzifələr, beynəlxalq elmi nüfuzu, çoxsaylı elmi əsərləri, dərslik və metodik vəsaitləri ilə Azərbaycan tibb elminin inkişafına verdiyi xidmətlər xüsusi vurğulanmışdır. Natiqlər professor İbadulla Ağayevin zəngin elmi irsinin, yüksək insani keyfiyyətlərinin, milli-mənəvi dəyərlərə bağlılığının onu həm elm aləmində, həm də ictimai mühitdə böyük hörmət və nüfuz sahibi etdiyini qeyd etmiş, yubiley münasibətilə ona səmimi təbriklərini çatdırmışlar.
Professor Ələddin Allahverdiyevin yubiley münasibətilə ünvanladığı təbrik məktubu, “Dədə Ələsgər Ocağı” İctimai Birliyinin idarə heyətinin üzvü, tədqiqatçı Araz Yaquboğlu tərəfindən səhnədə oxunub.

Tədbirin bədii hissəsində Əməkdar mədəniyyət işçisi Aşıq Ədalət Dəlidağlı, IX “Muğam” Televiziya Müsabiqəsinin finalçısı Yusif Cəfərbəyli, Zahidə Günəş, “İRƏVAN” xalq çalğı alətləri ansamblı tərəfindən səsləndirilən xalq və aşıq musiqisi nümunələri gecəyə xüsusi maraq qatmışdır. Ansambılın solistləri Rəşad İdrisoğlu, Elşad Həsənov, Minə Paşazadə, Rəvanə Vəliyeva, Vüqar Qasımlı, Rəvan Musalı və Turan İmamquliyevanın ifaları böyük maraqla qarşılanmışdır.
Qeyd edək ki, professor İbadulla Ağayev yarım əsrdən artıq elmi-pedaqoji fəaliyyəti dövründə epidemiologiya elminin inkişafına mühüm töhfələr vermiş, 40 namizədlik və 5 doktorluq dissertasiyasına rəhbərlik etmiş, yüzlərlə elmi əsərin müəllifi olmuşdur. O, eyni zamanda Azərbaycan aşıq poeziyasının, xüsusilə Dədə Ələsgər irsinin təbliği sahəsində göstərdiyi xidmətlərə görə 2024-cü ildə “Aşıq Ələsgər – 200” yubiley medalı ilə təltif edilmişdir.
Tədbirin sonunda yubilyara səmimi təbriklər ünvanlanmış, ona möhkəm cansağlığı və yeni elmi nailiyyətlər arzulanmışdır.