Qərbi Azərbaycan İcmasının Basarkeçər rayonu Dərə kənd sakinləri və Dərəli kökənli gənclərlə görüşü keçirilib.

Aidə Xudaverdiyeva açıq səsvermə yolu ilə kəndin icma sədri, Əhmədova Aytəkin Bəhram qızı gənclər bölməsinin rəhbəri seçilib.

Əvvəlcə ölkəmizin ərazi bütövlüyü və suverenliyi uğrunda şəhidlik zirvəsinə ucalan Vətən övladlarının əziz xatirəsi bir dəqiqəlik sükutla yad edilib.


İclası giriş sözü ilə açan hüquqşünas, jurnalist, Basarkeçər rayon üzrə İcma sədrinin müavini İlqar İsmayılov tədbir iştirakçılarını salamlayaraq Qərbi Azərbaycana qayıdış ideyasının təməlini qoyan Ulu Öndər Heydər Əliyevin Qərbi Azərbaycanla bağlı nitqi, həmçinin Prezident İlham Əliyevin 24 dekabr 2022-ci il tarixində İcmanın binasının açılış mərasimindəki çıxışını xatırladıb.

Dərəli ziyalıları və gənclərilə görüşün əlamətdar bir dövrə təsadüf etdiyini bildirib.
Qeyd edib ki, Azərbaycan Prezidenti, Silahlı Qüvvələrin Müzəffər Ali Baş Komandanı İlham Əliyevin rəhbərliyi altında rəşadətli ordumuz ölkəmizin ərazi bütövlüyünü tam təmin edib, Xocalıda, Əsgəranda, Xocavənddə, Ağdərədə, Xankəndidə üçrəngli, ay-ulduzlu bayrağımızı dalğalandırıb, xalqımıza böyük sevinc yaşadıb. Bildirib ki, nəyi necə, nə zaman etməli olduğunu yaxşı bilən dövlət başçısı İlham Əliyev indiyə qədər xalqına verdiyi bütün vədləri yerinə yetirib və tarixi torpaqlarımıza dinc şəkildə qayıdışımızın təmin olunması ilə bağlı səsləndirilən fikirlər, verilən vədlər də mütləq həyatda öz təsdiqini tapacaq.

Və hörmətli millət vəkili, Qərbi Azərbaycan İcmasının İdarə Heyətinin sədri Əziz Ələkbərlinin, Qərbi Azərbaycan İcmasının kordinatoru İman Məmmədovun, Basarkeçər rayon üzrə İcma sədri, AMEA-nın müxbir üzvü, Nuru Bayramovun tədbir iştirakçılarına salam və tövsüyyələrini çatdırıb.
İcmanın fəaliyyəti, rayon və kənd icmalarının əhəmiyyəti, formalaşma prosesi, Qayıdış Konsepsiyası və qarşıda duran vəzifələr barədə çıxış edib.

Sonra tədbiri aparmaq üçün söz Basarkeçər rayon üzrə İcma sədr müavini Fəzair Piriyevə verilib. Fəzair Priyev, Prezident İlham Əliyevin Qərbi Azərbaycan İcmasına böyük diqqət və qayğı ilə yanaşdığını, İcmanın öz fəaliyyətini yüksək səviyyədə qurması üçün dövlət dəstəyinin göstərildiyini söyləyib.
Gündəlikdə Basarkeçər rayon İcmasının təşkilatlanma məsələlərinin başa çatdırılması, kəndlər üzrə icma sədrlərinin vəzifə borcu, 1987-1991-ci ildə Basarkeçər rayonundan deportasiya olunmuş şəxslərin siyahılarının tamamlanması ilə bağlı görülən işlərin müzakirəsi məsələlərinə baxılıb.

Professor Vaqif Məhərrəmov Dərə kənd sakinləri adından çıxış edib. Bildirib ki, görüşün təşkil edilməsində başlıca məqsəd Azərbaycan Prezidenti İlham Əliyevin tarixi torpağımız Qərbi Azərbaycana qayıdışla bağlı siyasətinə dəstək ifadə etməkdir. 
Böyük Qayıdışa başlanıldığını xatırladan Vaqif Məhərrəmov Göyçəyə qayıdışın da mümkün olacağını vurğulayıb.

O, Aidə xanımı Dərə kənd İcma sədri seçilməsi, Aytəkin xanımı Dərə kənd Gənclər bölməsinin rəhbəri seçilməsi münasibəti ilə təbrik edib, rayonun tarixi və əhalisi barədə danışıb, deportasiya nəticəsində öz ata – baba yurdlarından didərgin düşdüklərini, onlarla soydaşımızın vətən həsrəti ilə dünyasını dəyişdiyini kədərlə dilə gətirib və digər qərbi azərbaycanlılar kimi qayıdışın mütləq baş tutacağına inandığını, doğma torpaqlara qovuşacağı günü səbirsizliklə gözlədiyini bildirib.

Həmçinin Dərə kəndinin digər sakinləri professor Namaz Yusubov, Qaçay İsmayılov, Cəlaləddin Əhmədov, Eldar Məmmədov, Niftalı Yusifov, Çingiz Vəliyev görüşdə çıxış edərək öz fikirlərini bildirib, tövsiyələrini səsləndiriblər.

Sonra çıxış edən Aidə Xudaverdiyeva, Dərə kənd İcma sədri kimi, Qərbi Azərbaycan İcmasının rəhbərliyinə, Vaqif müəllim və Dərəlilərin ona göstərdiyi etimada görə öz təşəkkürünü bildirib və kənd icmasının gündəliyini açıqlayıb.

Dərə kənd Gənclər bölməsinin rəhbəri kimi, Aytəkin Əhmədova gənclərlə belə bir görüşün təşkili onların uğurlarının təbliği, Dərə gəncləri arasında əlaqələrin qorunub saxlanılması, Qərbi Azərbaycan, o cümlədən Göyçə mahalı, Basarkeçər rayonu, Dərə kəndi haqqında həqiqətlərin təbliği, milli-mənəvi dəyərlərimizin nəsildən-nəsilə ötürülməsi baxımından olduqca əhəmiyyətli olduğunu vurğulayıb.

Görüşdə iştirak edən Bəyaz İsmayıl qızı Abbaszadə və digər gənclər də özlərini təqdim edərək, təhsil aldıqları istiqamət, ixtisasları, fəaliyyətləri, gələcəyə dair arzuları və planları barədə məlumat verib, belə bir görüşün təşkilinə görə səmimi minnətdarlıqlarını bildiriblər.

Tədbirdə Dərə kənd icmasında yeni yaradılan bölmələr və təyinatlar, həmçinin görüləcək işlər barədə də ətraflı məlumat verilib.

Aidə xanımı, Aytəkin xanımı GOYCE.AZ saytı adından təbrik edir, bu şərəfli yolda uğurlar arzu edirik!