“Azərbaycan Bayrağı” ordeni və “Vətən uğrunda” medalı ilə təltif olunan - MÜBARİZ QULUYEV BABACAN KƏND İCMASININ SƏDRİ SEÇİLDİ-FOTOLAR

Qərbi Azərbaycan İcmasının Basarkeçər rayonu Babacan kənd sakinləri ilə görüşü keçirilib və hörmətli Mübariz Quluyev açıq səsvermə yolu ilə kəndin icma sədri seçilib.

Əvvəlcə ölkəmizin ərazi bütövlüyü və suverenliyi uğrunda şəhidlik zirvəsinə ucalan Vətən övladlarının əziz xatirəsi bir dəqiqəlik sükutla yad edilib.


İclası giriş sözü ilə açan Basarkeçər rayon İcma sədrinin müavini Fəzair Piriyev tədbir iştirakçılarını salamlayaraq Qərbi Azərbaycana qayıdış ideyasının təməlini qoyan Ulu Öndər Heydər Əliyevin Qərbi Azərbaycanla bağlı nitqi, həmçinin Prezident İlham Əliyevin 24 dekabr 2022-ci il tarixində İcmanın binasının açılış mərasimindəki çıxışını xatırladıb. 
İcmanın fəaliyyəti, rayon və kənd icmalarının əhəmiyyəti, formalaşma prosesi, Qayıdış Konsepsiyası və qarşıda duran vəzifələr barədə çıxış edib.

Sonra çıxış edən Basarkeçər rayon İcma sədrinin müavini Lütfiyar Nəsibov, Prezident İlham Əliyevin Qərbi Azərbaycan İcmasına böyük diqqət və qayğı ilə yanaşdığını, İcmanın öz fəaliyyətini yüksək səviyyədə qurması üçün dövlət dəstəyinin göstərildiyini söyləyib.
Gündəlikdə Basarkeçər rayon İcmasının təşkilatlanma məsələlərinin başa çatdırılması, kəndlər üzrə icma sədrlərinin vəzifə borcu, 1987-1991-ci ildə Basarkeçər rayonundan deportasiya olunmuş şəxslərin siyahılarının tamamlanması ilə bağlı görülən işlərin müzakirəsi məsələlərinə baxılıb.

Basarkeçər Rayon İcma Sədrinin gənclər və mətbuatla əlaqələr üzrə müavini İlqar İsmayılov hörmətli millət vəkili, Qərbi Azərbaycan İcmasının İdarə Heyətinin sədri Əziz Ələkbərlinin, Qərbi Azərbaycan İcmasının kordinatoru İman Məmmədovun, Basarkeçər rayon üzrə İcma sədri, AMEA-nın müxbir üzvü, Nuru Bayramovun tədbir iştirakçılarına salam və tövsüyyələrini çatdırıb. Və Babacan ziyalıları və gənclərilə görüşün əlamətdar bir dövrə təsadüf etdiyini bildirib. 
O qeyd edib ki, Azərbaycan Prezidenti, Silahlı Qüvvələrin Müzəffər Ali Baş Komandanı İlham Əliyevin rəhbərliyi altında rəşadətli ordumuz ölkəmizin ərazi bütövlüyünü tam təmin edib, Xocalıda, Əsgəranda, Xocavənddə, Ağdərədə, Xankəndidə üçrəngli, ay-ulduzlu bayrağımızı dalğalandırıb, xalqımıza böyük sevinc yaşadıb. Bildirib ki, nəyi necə, nə zaman etməli olduğunu yaxşı bilən dövlət başçısı İlham Əliyev indiyə qədər xalqına verdiyi bütün vədləri yerinə yetirib və tarixi torpaqlarımıza dinc şəkildə qayıdışımızın təmin olunması ilə bağlı səsləndirilən fikirlər, verilən vədlər də mütləq həyatda öz təsdiqini tapacaq.
Babacan kökənli gənclərlə belə bir görüşün təşkili onların uğurlarının təbliği, Babacan gəncləri arasında əlaqələrin qorunub saxlanılması, Qərbi Azərbaycan, o cümlədən Göyçə mahalı, Basarkeçər rayonu, Babacan kəndi haqqında həqiqətlərin təbliği, milli-mənəvi dəyərlərimizin nəsildən-nəsilə ötürülməsi baxımından olduqca əhəmiyyətli olduğunu vurğulayıb.

İskəndər Namazov Babacan kənd sakinləri adından çıxış edib. Bildirib ki, görüşün təşkil edilməsində başlıca məqsəd Azərbaycan Prezidenti İlham Əliyevin tarixi torpağımız Qərbi Azərbaycana qayıdışla bağlı siyasətinə dəstək ifadə etməkdir.
 Böyük Qayıdışa başlanıldığını xatırladan İskəndər Namazov Göyçəyə qayıdışın da mümkün olacağını vurğulayıb.
Daha sonra tədbirdə qonaq qismində iştirak edən şair Tofiq Abdullayev, şair-publisist Qılman İman, Dərə kənd icmasının sədri Aidə Xudaverdiyeva, Qaraqoyunlu kənd icmasının sədri Tahir Kərimov icma üzvülərinə uğurlar diləyib, onlar Mübariz müəllimi İcmanın sədri seçilməsi münasibəti ilə təbrik edib, rayonun tarixi və əhalisi barədə danışıb, deportasiya nəticəsində öz ata – baba yurdlarından didərgin düşdüklərini, onlarla soydaşımızın vətən həsrəti ilə dünyasını dəyişdiyini kədərlə dilə gətirib və digər qərbi azərbaycanlılar kimi qayıdışın mütləq baş tutacağına inandığını, doğma torpaqlara qovuşacağı günü səbirsizliklə gözlədiyini bildiriblər.

Həmçinin Babacan kəndinin digər sakinləri Vəliyev İlqar, Elman Əjdərov, Nadir Ağacanov, Ram Ağacanov, Eynulla Namazov, Loğman Əjdərov və digərləri görüşdə çıxış edərək öz fikirlərini bildirib, tövsiyələrini səsləndiriblər.

Sonra çıxış edən Mübariz Quluyev, Babacan kənd İcma sədri kimi, Qərbi Azərbaycan İcmasının rəhbərliyinə, İskəndər müəllim və Babacanlıların ona göstərdiyi etimada görə öz təşəkkürünü bildirib və kənd icmasının gündəliyini açıqlayıb.

Mübariz müəllimi Goyce.az saytı adından təbrik edir, bu şərəfli yolda uğurlar arzu edirik!