BÖYÜK NƏRİMANLILAR SİLSİLƏSİNDƏN - QURBANOV ELŞƏN MAHMUD OĞLU

Gözəl Vətənimiz Azərbaycanın elm xadimləri dünyanın hər olduqları yerində elmi səviyyələri, Azərbaycançılıq məfkurələri ilə hər zaman dünyaya nümunə olmuşlar. Bu müqəddəs Vətənin hər oba- oymağı öz gözəl insanlarının mənəvi gözəllikləri ilə daha da gözəldir. Yolumuzu intizar içərisində gözləyən mübarək Göyçə torpağı da yurdumuzun ümmanlar yetirən bölgələrindən biridir.

Göyçə mahalının Nərimanlı kəndi tarixin bütün dönəmlərində yetirdiyi böyük şəxsiyyətləri ilə seçilib. Bu gün də belədir, bu kəndin elm adamlarının statistik göstəricisi davamlı olaraq artmaqdadır. Nərimanlı kəndi dünya elminə saysız -hesabsız elmi yeniliklər bəxş etmiş 49 elm adamı yetirmişdir. Kutsal məkan olan Göyçə mahalı öz əhalisi içərisindən seçilmişlər- zəkası parlaq, düşüncəsi aydın, təfəkkürü dərin, təxəyyülü səlis, natiqliyi, elmi- analitik imkanları geniş olan beyinlər, düşüncələr yetirməyilə coğrafi pasportunu qızıl hərflərlə yazmışdır. Bütün tarixi proseslərə həmin tarixdə yaşayıb, söz və iqtidar sahibi olmuş şəxsiyyətlər rəhbərlik etmişlər, bununla da həm tarix yazmışlar, həm də tarixə yazılmışlar . Bu mənada Göyçə mahalı köksündə yatan qızıl yataqları kimi qiymətli tarixini qoynunda böyütdüyü böyük şəxsiyyətlərilə birgə yaratmışdır.

Nərimanlı kəndini şərəfləndirən alimlərimizdən biri texnika elmləri üzrə fəlsəfə doktoru, apardığı elmi-tədqiqatların nəticələri SSRİ-də Dəniz neft-qaz qurğularının layihələndirilməsi, tikilməsi və istismarı üzrə tikinti normalarına (SNİP 2.0604-82) daxil edilmiş, həmçinin Azərbaycan üzrə sahə inşaat normalarına daxil edilmiş dəniz stasionar platformalarının layihələndirilməsinin müəllifi (SİN 013600257-98), 14 müəlliflik və patent sahibi, qiymətli zəkası ilə dünya elm sisteminə 80 dən çox elmi məqalə bəxş etmiş Qurbanov Mahmud Fərhad oğlunun ailəsində, 1962- ci ildə Bakı şəhərində dünyaya göz açan Qurbanov Elşən Mahmud oğludur.

Professor Elşən Qurbanov Bakı şəhərində dünyaya gəlib, orta məktəbi də elə bu möhtəşəm şəhərdə bitrimişdir. Yay tətillərini və rüblük tətilləri Göyçədə keçirərdi. Göyçənin təbii minerallarla, qiymətli mikroelementlərlə öz keyfiyyət parametrlərini zənginləşdirən saf bulaq suları Elşən müəllimin qiymətli təfəkkürünün, geniş təxəyyülünün, dərin zəkasının formalaşmasında müstəsna rol oynamışdır desəm, səhv etmiş olmaram. Ziyalı çevrəsində, elm adamı olaraq hər yerdə hörmətlə qarşılanan alim ailəsində böyümək Elşən müəllimin həyat meyarlarını müəyyənləşdirən ən başlıca amillərdəndir. Şəhər mühitində intellektuallıq sistemi içərisində boya- başa çatması, mütəmadi olaraq kənd həyatının maraqlı tərzlərini də görməsi, atası Mahmud müəllimlə, əmisi rəhmətlik Professor Maqsud müəllimlə elin iftixarını görməsi, el qınağını, el tərbiyəsini dəyərləndirməsi Elşən Qurbanovda fərqli bir dünyagörüşünün formalaşmasına stimul olmuşdur. Şübhəsiz ki, hələ sovetlər dönəmində atası hörmətli Mahmud müəllimlə birlikdə bir neçə Avropa ölkələrinə səyahətdə və yaxud elmi konfranslarda olmağı , olimpiadalara qatılmağı onun genetik xarakterlərinin kodu ilə uzlaşan ziyalılıq prinsiplərinin əsaslarını formalaşdıran amillərdən biri kimi düşünülə bilər.

... Biz kənd uşaqlarıydıq, Elşən Qurbanov kəndə gələn zaman davranışlarına, danışıq tərzinə, elmi diskussiyalarda iştirakına, sual- cavablaşmada fəallığına diqqətlə fikir verərdik. O, orta məktəb illərindən mükəmməl elmi biliklərə malik olması ilə fərqlənirdi.

Kənddə axşamlar mal-qara otlamaqdan geri dönərkən hər məhəllənin uşaqları ayrı dəstələrlə yığışıb elmi bəhslər- suallaşmalar aparardıq. Bizim məktəb çox güclü idi. Heç Bakı məktəblərindən geri qalmadığı, bəzi hallarda irəlidə olduğu hər zaman şəhərdə təhsil alan qonaqlarımızla apardığımız bütün elmi polemikalarda hiss edilirdi. Elşən müəllimin şəhər həyatından açdığı, Bakının səciyyəvi gözəlliklərini təsvir etdiyi söhbətlər tay- tuşların marağına səbəb olardı. Onun gerçək intellektual potensiala malik olması erkən yaşlarından hiss olunurdu. Nəhayətdə isə bütün proqnozlar özünü doğrultdu. İndi artıq Professor Elşən Mahmud oğlu Qurbanov dünyanın nüfuzlu dairələrində tanınmış böyük azərbaycanlı alimdir.

O, Azərbaycan, İnqilis, Rus, dillərini mükəmməl; Türk, Yapon dillərini yüksək səviyyədə bilir.
1979-1984-cu ildə Azərbaycan Dövlət Universitetinin Fizika fakültəsində Magistr dərəcəsi, 1986-1990-cı ildə Sankt Peterburq Dövlət Texniki Universitetində “Neft və Qaz Qurğularının hidrodinamikası, layihələndirməsi və tikintisi” üzrə Fəlsəfə Doktoru (Ph.D.) dərəcəsi almışdır. 1994-1996-cı ildə Yaponiyanın Tsukuba Universitetinin, Sosial və İqtisadi Planlaşdırma fakultəsində “Beynəlxalq Müştərək Müəssisələrin və Multi-Milli Korporasiyaların İdarəolunması” üzrə xüsusi proqramın Fəlsəfə Magistri (Yaponiyanın MBA uyğunluğu) dərəcəsi almağa müvəffəq olmuşdur.

1996-1998-ci ildə Tsukuba Universitetin (Yaponiya) “İdarəetmə Elmləri və Sosial Siyasət” İnstitutunda “Yapon şirkətlərinin qeyri müəyyən bazarlarda investisiyaları”-nı araşdıraraq doktorluq dərəcəsini müdafiə edib. Yaponiyada elmi işi müdafiə etmiş ilk Azərbaycanin vətəndaşı olaraq, 1998-ci ilin fevral ayında Tokio şəhərində Azərbaycan Respublikasının Prezidenti cənab Heydər Əliyevlə görüş zamanı onun doktorluq işi Ümummilli Lider Heydər Əliyevə Yaponiya rəsmi nümayəndələri tərəfindən şəxsən təqdim olunaraq yüksək səviyyədə təqdir edilmişdir.
2011-cu - 2013-ci illərdə London İqtisadiyyət Məktəbində (London School of Economics) “Beynəlxalq İqtisadiyyat və Xarici Siyasət” mövzusunda Böyük Britaniyanın Diplomatları üçün Xüsusi Proqramın məzunudur.
Professor Elşən Mahmud oğlu Qurbanovun əmək fəaliyyəti çoxşaxəlidir və dünyanın harasında olursa, olsun Azərbaycan adına ucalıq gətirən lahiyələrin müəllifi və icraçısı kimi şöhrət qazanmışdır.

1983-cü ildən Dövlət Neft Şirkətinin Layihə institunda Neft və Qaz qurğularının rəqəmsal layihələşdirilməsi departamentində mühəndislikdən başlayıb, SOCAR-da işlədiyi müddətdə Azəri-Çiraq-Günəşli layihəsinin İqtisadi əsaslandırılmasının koordinatoru olmaqla bərabər Xarici İnvestisiyalar İdarəsinin Marketing və Kontraktlar Departamentinin Müdir müavini işləmişdir.
1998-ci ildən İTOCHU Korporasiyasının Azərbaycanda Nümayəndəsinin müavini, sonra isə Yapon Azərbaycan Neft Əməliyyət Şirkətinin (JAOC) STƏM, Əməliyyatlar, Dövlət və İctimaiyyətlə Əlaqələr üzrə Baş Koordinatoru olmuşdur.
2005-ci ildən AZPROMO-nun İxrac üzrə direktoru, AZPROMO-nun Qazaxıstanda Nümayəndəliyin rəhbəri, sonra isə 2010-cu ildən Alternativ və Bərpaolunan Enerji Mənbələri üzrə Dövlət Agentliyinin “Strateji İnkişaf və İnvestisiya Layihələri” departamentinin müdiri olub.
2011-ci ildən Azərbaycanda Böyük Britaniya Səfirliyinin Enerji Sektoru və İqtisadi məsələlər üzrə baş müşaviri olaraq Böyük Britaniyanın maliyyə qurumları ilə əlaqələr, iri miqyaslı layihələrin inkişafı və Dövlət orqanları ilə əlaqələr üzrə məsul şəxs olub.
2013-cü ildən Şotlandiyanın Ariot Vott Universiteti və Baki Ali Neft Məktəbinin professoru olaraq “Neftkimya sektorunda Biznesin və Layihələrin idarəolunması və İnkişafı”, “Neft Sektorunun İqtisadiyyatı və Layihələrinin İnkişafı” və “Strateji İdarıetmə” mövzularında aparıcı lektor olub.
2015-ci ildən özəl sektorda Maşınqayırma, Mühəndislik və Kənd təsərrüfatı sahələrində innovativ və Hi-Tech layihələrinin maliyyələşdirilməsi və inkişafına rəhbərlik edib.

2018-ci ildən Azərbaycan Respublikası Kiçik və Orta Biznesin İnkişafı Agentliyinin İdarə Heyəti Sədrinin müşaviri vəzifəsinə təyin edilmişdir. 2020-ci ilin Yanvarından Biznesin İnkişafında Rahat Güvənli Əməkdaşlıq – BİRGƏ investisiya şirkətinin Baş Direktoru olmuşdur.
2020-ci ilin Sentyabrından Azərbacan Memarlıq və İnşaat Universitetinin Biznesin İqtisadiyyatı və Menecment kafedrasının sonra isə Layihələrin İdarə olunması kafedrasının professorudur.
Dünya Bankı, BMT İnkişaf Programı və Avropa İttifaqının və yerli qrant əsaslı təhsil və təlim, energetika, emal və sairə bu kimi sektorlarda bir sıra layihələrinin iştirakçısı və rəhbəri olub.
2013-cü ildən mütəmadi olaraq Bakı Ali Neft Məktəbi, Heriot Watt Universiteti, Jeneva Biznes Məktəbi, Qərb Universiteti dəvət olunmuş professor və ildən isə Azərbaycan Memarlıq və İnşaat Universitetinin Biznesin İqtisadiyyatı və Menecment kafedrasının professoru vəzifəsində işləyib. Dörd Magistr və bir Doktorantın elmi rəhbəridir.
Respublika televiziyasının bir sıra kanallarında iqtisadiyyat, energetika, alternativ enerji və beynəlxalq əlaqələr üzrə aparıcı şərhçidir.
Yaponiyada təhsil almış Azərbaycanlı məzunların assosiasiyasının təsisçisi və uzun müddət sədri olub.
Iqtisadiyyat, Biznes, İdarə etmə, Maliyyə, Birbaşa İnvestisiyalar, Alternativ və bərpa olunan enerji, Neft və Qaz və yeni texnologiyalar sahələrdə yetmişdən artıq elmi məqalələr, məruzələr, rəsmi və məxfi hesabatların və üç kitabın müəllifidir.
Beynəlxalq Neft Mühəndisləri (SPE) cəmiyyətinin üzvüdür.
Birinci Qarabağ Müharibəsi başlayan zaman Elşən Qurbanov da bir çox vətənpərvər insanlar kimi könüllü olaraq Vətən uğrynda döyüşlərdə iştirak etmişdir. Birinci Qarabağ müharibəsi veteranıdır. Ailəlidir. 3 övladı var.

Hər kəsin bəxtinə ucalmaq yazılarsa ilk olaraq ana-atasını, ailəsini şərəfləndirər. Hər eli- obanı da öz yetirdiyi övladları ucaldar. Elin ucalıq səlnaməsinə ucalığı ilə bəzək vuran insanlar, öz adları ilə bərabər elin adını, yurdun adını, Vətənin adını uca tutarlar. Bu ucalıq mərtəbəsində özləri də ucalarlar. Bütün insani dəyərlər müqəddəs yurd yerlərimizdə ağırlaşan kişilərin qanından keçib filtrlənib, süzülüb saflaşıb öz əyarını tapmış, dünya xalqlarının xarakterlərində də sirayət etmişdir. Dünya xalqlarının da ayrı- ayrılıqda müsbət xarakterlərini incələdikə də bu xasiyyətin məhz Oğuz Yurdundan transfer olduğuna əminlik yaranır. Bu yurdun ən qiymətli meyvəsi ADAMdır. Adamlıq içərisində, adamlar içərisində adamlığı ilə sayılan dəyərli kişinin övladı olmaq da bir səadət, bir tale yazısıdır. İstənilən bir dəyərin yetişməsi üçün mühit olması vacib məsələdir təbii ki. Nəyin boy verməsini istəyiriksə onun üçün optimal mühit şəraitini müəyyənləşdirməliyik. Alimlik də belədir. Alim olmaq üçün ailə, cəmiyyət və özünütərbiyə mühiti formalaşmalıdır. Bu amillər əsasən kamil şəxsin öz qətiyyətinə, məsləkinə, amalına bağlana bilirsə demək nəticə gözlənilir və o mərdliyə bağlıdır. Qətiyyət və prinsipallıq ucalığa gedən yolun başlanğıcıdır. Amma gərək bu yolda yükün fəzilət bulağının suyu ilə yoğrulmuş xəmirdən tutula. Böyük alimlərimizdən biri, dəyərli ağsaqqalımız Mahmud Qurbanovun ömür bağçasının barı bu cür olması təsadüfi sayıla bilməz. Hörmətli Mahmud müəllimin ailəsində Professor Elşən Qurbanov yetişməli idi!

Hacı Abbas Əli oğlu Bağırov
provizor-həkim
Tibb üzrə fəlsəfə doktoru
Qələbə Tibb Mərkəzi MMC-nin direktoru