Oxuduğu məktəbdə adı əbədiləşən - ŞƏHİD ELŞAD HƏMİDOV.

Bakı şəhəri Binəqədi rayonunda şəhid Elşad Qoşqar oğlu Həmidov adına 267 nömrəli məktəb-liseydə, I Qarabağ müharibəsində qəhrəmancasına şəhid olmuş Qərbi Azərbaycanın Göyçə mahalının Basarkeçər rayonunun Qaraqoyunlu kəndinin sakini Həmidov Elşad Qoşqar oğlunun anım günü ilə bağlı tədbir keçirildi.

Şəhidin adını daşıyan 267 nömrəli məktəb-liseydə keçirilən tədbirdə Binəqədi Rayon İcra Hakimiyyətinin başçısının müavini Sevinc Süleymanova, 267 nömrəli məktəb-liseyin direktoru Rəna Ağazadə, məktəbin pedaqoji kollektivi, vətənpərvərlik, vətənə, dövlətə sədaqət ruhunda yetişmiş məktəb-liseyin şagirdləri, bizə ləyaqət örnəyi olan Şəhdimizlə çiyin-çiyinə vuruşan, Qazilər və Vətən müharibəsi iştirakçıları, Şəhidimizin ailə üzvləri, yaxınları, doğmaları və Şəhdimizin dünyaya göz açdığı Qərbi Azərbaycan Göyçə mahalı Basarkeçər rayon-Qaraqoyunlu kənd sakinləri iştirak etdilər.

Əvvəlcə Azərbaycanın Dövlət Himni səsləndi, ölkəmizin ərazi bütövlüyü və suverenliyi uğrunda şəhidlik zirvəsinə ucalan Vətən övladlarının əziz xatirəsi bir dəqiqəlik sükutla yad edildi.

Tədbiri giriş sözü ilə açan Rayon İcra Hakimiyyəti başçısının müavini Sevinc Süleymanova çıxış edərək qeyd etdi ki, Prezident, Ali Baş Komandan İlham Əliyevin həyata keçirdiyi sosial-iqtisadi strategiya Azərbaycanı dünyanın ən dinamik, inkişaf etmiş dövlətləri sırasına gətirib çıxarıb, dünya ölkələri arasında söz sahibi edib. Ölkəmizdə hər bir sahə üzrə aparılan genişmiqyaslı işlərdən söz açan Sevinc Süleymanova şanlı zəfərimizin əldə olunmasında canından keçən şəhidlərimizə Allahdan rəhmət, qazilərimizə isə şəfa dilədi. Və qeyd etdi ki, Elşad Həmidov 1991-ci ildə Krım şəhərində hərbi məktəbə qəbul  olunmuşdur. O , ikinci kursu başa vurduqdan sonra Bakıya qayıdaraq Hərbi Akademiyada təhsilini davam etdirmişdir. Ona müharibə şəraiti olduğu üçün vaxtından əvvəl diplom vermişdilər. Elşad Həmidov leytenant rütbəsi almış, 1994-cü ilin aprelin 19-da Ağdam bölgəsinə hərbi xidmətə göndərilmişdi. Xidməti borcunu layiqincə yerinə yetirən Elşad Həmidov 1994-cü ilin aprel ayının 21-də Ağdam istiqamətində gedən döyüşlərdə xüsusi şücaət göstərərək şəhid olmuşdur. Bundan əlavə ölkə rəhbərliyinin şəhid ailələrinə daimi diqqət və qayğısının olduğunu ziyarət iştirakçılarının diqqətinə çatdırdı.

Şəhdimizlə çiyin-çiyinə vuruşan, Qazilər və Vətən müharibəsi iştirakçıları öz çıxışlarında
Elşad Həmidovun döyüş yolu barədə tədbir iştirakçılarına ətraflı məlumat verdi. Şəhidin valideynlərinə və ailə üzvlərinə başsağlığı verərək, belə qəhrəman övlad böyütdükləri üçün minnətdarlığını bildirdilər.

267 nömrəli məktəb-liseyin direktoru Rəna Ağazadə çıxışında qeyd etdi ki, Prezident, Ali Baş Komandan İlham Əliyevin rəhbərliyi ilə Azərbaycan dövləti 2020-ci ildə öz torpaqlarını işğaldan azad etməklə tarixi ədaləti bərpa etdi. Ermənistan 30 il müddətində Azərbaycan torpaqlarını işğal altında saxladı. Amma heç vaxt o torpaqlarda rahatlıq tapmırdı. Çünki bilirdi ki, gec-tez o torpaqlardan qovulacaqlar. Yaşadığımız bu günlər xalqımızın tarixinin parlaq və unudulmaz səhifələrindən birini təşkil edir. Şəhidlərimizin qisası alındı, qisasımz qiyamətə qalmadığını vurğuladı.

Şəhidimiz orta məktəbdə təhsil aldığı illərdə müəlliməsi olmuş Abdullayeva Südabə çıxış edərək Elşad Həmidovu çox vətənpərvər, istiqanlı, mehriban şagird kimi xatırladığını diqqətə çatdırdı. Onunla fəxr etdiyini və daim qürür duyduğunu bildirdi.

Şəhid Elşad Həmidovun doğmaları şəhid ailələrinə göstərilən diqqət və qayğıya görə Prezident İlham Əliyevə və Birinci vitse-prezident Mehriban Əliyevaya öz minnətdarlıqlarını bildirdilər.

Sonda 267 nömrəli məktəb-liseyin şagirdlərinin şəhidlər haqqında söylədikləri şeir parçaları və öz ifalarında vətənpərvər musiqiləri dinlənildi.

Belə yüksək səviyyəli tədbirə görə, Binəqədi rayon rəhbərliyinə, Binəqədi Rayon İcra Hakimiyyətinin başçısının müavini Sevinc Süleymanovaya, 267 nömrəli məktəb-liseyin direktoru Rəna Ağazadəyə və məktəbin pedaqoji kollektivinə, təşəkkür edirik!
 

İlqar İSMAYIL