"Tarixi yurdlarımızı anım günü"

Qərbi Azərbaycana(Ermənistana) Qayıdış Birliyi Mətbuat xidmətinin yaydığı məlumatda bildirilir ki, 23 dekabr tarixində QAQB-nin təşkilatçılığı ilə Xırdalan şəhər Mədəniyyət Mərkəzində, " Tarixi yurdlarımızı anım günü " adlı tədbir keçirildi. Tədbir saat 11-də bir qrup QAQB üzvlərinin və qonaqların iştirakı ilə Fəxri Xiyabanda ümummilli lider, mərhum prezidentimiz Heydər Əliyevin və tanınmış avtomoloq Zərifə xanım Əliyevanın, eyni zamanda azadlıq və müstəqilliyimiz uğurunda aparılan mübarizənin ilk lideri olmuş, mərhum eks prezident Əbülfəz Elçibəyin məzar komplekslərinin ziyarət olunaraq, güllər və əklillər qoyularaq ruhlarına dualar verilməsi ilə başladı. Ölkəmizin müstəqilliyi və ərazi bütövlüyü uğurunda həlak olmuş şəhidlərimizin də məzarları ziyarət olunandan sonra, tədbir keçirilən məkan gəlinmiş və tədbir Mədəniyyət Mərkəzində rəsmi və bədii iki hissədən olmaqla keçirilmişdir. Uğurlu və möhtəşəm alınan tədbiri vətənpərvər, yurd sevdalı şair Eldar İsmayıl Böyüktürk açaraq tədbir iştirakçılarını və tədbirə qatılmış qonaqları salamladıqdan sonra dövlət himni səsləndirildi.

Eyni zamanda müvəqqəti olaraq silahlı erməni quldur dəstələrinin, erməni millətçilərinin, daşnaklarının işğalı altına düşmüş qəbirləri, tarixi yurdlarımızda qalmış əzizlərimizin və şəhidlərimizin ruhları bir dəqiqəlik sükutla yad edildikdən sonra, Ermənistandan yerli azərbaycanlı əhalinin deportasiyalarına və soyqırım aktlarına həsr olunmuş video rolik nümayiş olundu. Video rolikin nümayişindən sonra söz QAQB sədri Rizvan Talıbova verildi. Rizvan Talıbov qonşu dövlətlərdən Cənubi Qafqaza köçürülmüş, gəlmə erməni millətçilərinin son iki yüz il ərzində İrəvan xanlığı ərazilərində Qərbi Azərbaycanda, indiki Ermənistan ərazilərində yaşamış yerli azərbaycanlıların məruz qaldıqları soyqırım və deportasiya aktları haqqında müfəssəl məlumat verərək, ictimai birlik və cəmiyyət olaraq hüquqları kobud şəkildə pozulmuş, zülmə və işgəncələrə məruz qalmış Ermənistan qaçqınlarının hüquqlarının bərpa olunması, Ermənilərin qəsb etdikləri mal-mülklərinə, mənəvi ziyanlarına görə kompensasiya ödənilməsinə nail olunması, müvəqqəti olaraq tərk etmək məcburiyyətində qaldıqları tarixi yurdlarına sahib çıxmaq, tarixi yurdları unutmamaq və zamanı gəlincə,Yurdlara Qayıdış üçün nə işlər görmək lazım olduğu barədə tədbir iştirakçılarına geniş, məlumat verdi. Tarixi yurdlarımıza, Ermənistana qayıdışın yalnız Göyçə, Zəngəzur, Loru-Pəmbək mahallarını əhatə edəcək sərhədlər daxilində Dağlıq Qarabağ ermənilərinə veriləcək statusa bərabər statusda, Qərbi Azərbaycan Muxtar Respublikası yaradılandan sonra mümkün ola biləcəyini xüsusi qeyd etdi. Digər çıxışçılar QAQB sədrinin Regional şöbələr və Regional təmsilçilərlə iş üzrə müavini, Meğri rayonunun Nüvədi kənd sakini, 1-ci qrup Qarabağ müharibəsi veteranı Hacı Qəhrəman Qəhrəmanov çıxışında, ermənilərin azərbaycanlı əhaliyə qarşı törətdikləri vəhşilikləri, tarixi faktlarla göstərərək, bu vəhşiliklərə qarşı susqun qalmamağa, haqq səsimizi ölkə və dünya ictimaiyyətinə çatdırmağa və haqqımızı tələb etməyimizin vaxtının çatdığını bildirməyə çağırış etdi! Göyçə mahalından olan ağsaqqal Abbas Mazanov Qərbi Azərbaycanlıları bir olub azərbaycan xalqı ilə birgə Azərbaycan dövlətinin dəstəyi ilə yurdlarımız uğurunda haqqlarımız yolunda aktiv mübarizə aparmağa səslədi. QAQB sədrinin müavini beş ildir ki, Qarabağda qanunsuz olaraq girovluqda saxlanılan Dilqəm Əsgərov və Şahbaz Quliyevin qardaşı olan Sahib Musayev çıxışında obyektiv erməni araşdırmaçılarının yazılarına istinad edərək, Şimali Azərbaycan Rusiya imperiyası tərəfindən işğal olunan tarixə qədər, indiki Ermənistan ərazilərində çox az sayda, erməni əhalisinin yaşadıqlarına diqqət çəkərək, həmin tarixdən başlayaraq ermənilərin rusların dəstəyi ilə tarixi torpaqlarımızda azərbaycanlı əhaliyə qarşı etnik təmizləmə və soyqırım aktları həyata keçirdiklərini bildirdi. Tədbirə qatılmış Türkiyəli qonaq Osmanlı Diriliş Hərəkatının başqanı Turabi Ergün bəy, Türk və Azərbaycan xalqının qardaş olduğunu və erməni işğalçılarına qarşı da birgə mübarizə aparmağın önəmini qeyd edərək, daim bu mübarizədə dəstək verməyə hazır olduqlarını bildirdi. Digər çıxışçılar QAQB İdarə Heyyətinin üzvü, Dərələyəz mahalından olan Vüqar Abbasov və Dərələyəz vətənpərvərliyin təbliği ictimai birliyinin sədri Kamil Dərələyəzli; əslən İrəvan şəhərindən olan, yazıçı-ssenarist, Qərbi Azərbaycana həsr olunmuş bir çox filmlərin rejissoru Oktay Mirbabayev, şairələr Zöhrə xanım Xəlili və Dürrə Şirin, bu günlərdə ilin tələbəsi seçilmiş, QAQB sədrinin Beynəlxalq təmsilçilər və Beynəlxalq təşkilatlarla iş üzrə müavini Sabir Rüstəmov; Qarabağ qazisi Arif Məhərrəmov və digərləri yurdlarımıza sahib çıxmaq və hüquqlarımızın bərpa olunması uğurunda aktiv mübarizə aparmağa çağırışlar etdilər!!!Tədbirin rəsmi hissəsinin sonunda 23 dekabr tarixinin Qərbi Azərbaycandan, indiki Ermənistandan zorakılıqla qovulmuş,deportasiya və soyqırıma məruz qalmış soydaşlarımızın "Soyqırımı və Tarixi Yurdlarımızın Anım günü" olaraq rəsmiləşdirilməsi və hər il dövlət səviyyəsində qeyd olunması xahişi ilə, Azərbaycan Respublikası prezidenti,İlham Əliyev cənablarına,Milli Məclisin spikeri cənab Oktay Əsədova, o cümlədən  Beynəlxalq təşkilatlara,Minsk qrupunun həmsədri olan ölkələrin başçılarına, ölkə və dünya ictimaiyyətinə ünvanlanmış müraciət oxunaraq qəbul olundu. Tədbirin bədii hissəsində QAQB Ali Məclisinin üzvü, ssenarist və rejissor Vaqif Həbibbəylinin ssenarisi və quruluşunda xalq artisti Şükufə xanımın rəhbərlik etdiyi dram kollektivi ilə birgə hazırladığı səhnəcik ilə, 30 ildir yurdlarımıza olan həsrətimizi təsirli,hüzünlü bir dildə tamaşaçılara çatdırıldı! Tədbirin bədii hissəsi QAQB Ali Məclisinin sədr müavini, sevilən incəsənət xadimi, Zöhrə xanım Xəlilinin rəhbərliyi və aparıcılığı ilə, sevilən aşıqlarımız Rəfiqə Göyçəli, Əli Kəlbəcərli, Familə Göyçəli, əməkdar mədəniyyət işçisi Təbriz Gədəbəyli, aşıq Pəhləvan, Qafan elindən Aydın Rəvanın və digərlərinin, yurd həsrətli şeirlərin və mahnıların ifa edilməsi ilə başa çatdı.