Müəllim ucalığı

Azərbaycan xalqının milli təfəkküründə müəllim adı hər zaman ucalıq, ziyalılıq və mənəvi saflıq rəmzi kimi təcəssüm olunmuş, böyük hörmətlə, yüksək ehtiramla çəkilmişdir. Sosial statusundan, tutduğu vəzifədən asılı olmayaraq bu gün də hər bir azərbaycanlı cəmiyyətdəki mövqeyinə, qazandığı biliklərə, ümumən bir şəxsiyyət kimi formalaşmasına görə özünü məhz müəllimlərinə borclu sayır.

Azərbaycan məktəblərində peşəsinə ürəkdən bağlı olan, zəngin biliyi, dünyagörüşü, əsl müəllimə xas olan yüksək insani keyfiyyətləri ilə seçilən, öz mənəvi vəzifələrini layiqincə yerinəyetirən müəllimlər çoxdur. Belə müəllimlərdən biri də Şəmkir rayonu Kür qəsəbə H.Z.Tağıyev adına 2 saylı orta məktəbin müəlliməsi Dursun Quliyevadır. Məktəbdəki fəaliyyəti ilə tanışlıqdan sonra əmin olursan ki, bu insan məhz peşəsinin vurğunudur. Bir müəllimə kimi həyat idealı cəmiyyətin onun qarşısında qoyduğu vəzifəni - hərtərəfli biliyə, onları tətbiq edə bilmək qabiliyyətinə, yüksək əxlaqi keyfiyyətlərə malik nəsil tərbiyələndirmək vəzifəsini şərəflə yerinə yetirməkdir. Dursun müəllimənin təbirincə, yaxşı müəllim cəmiyyət üçün, millət üçün hava, su və çörək qədər vacibdir. Yaxşı müəllimi olmayan dövlət, xalq inkişaf edə bilməz. O dövlətin ki, yaxşı müəllimi yoxdur, demək onun gələcəyi də dumanlıdır.

Dursun müəllimə 1977-ci ildə Gəncədə Pedaqoji İnstitutun ibtidai təhsil, pedaqogika və metodika fakültəsini bitirib. Təhsilinə uyğun olaraq əmək fəaliyyətinə pedaqoji sahədə başlayıb. 1978-ci ildən Şəmkir rayonu Kür qəsəbə H.Z.Tağıyev adına 2 saylı orta məktəbdə sinif müəlliməsi kimi fəaliyyət göstərir. 30 ildən artıqdır ki, bu orta məktəbdə çalışan, özünəməxsus fəaliyyəti ilə fərqlənən Dursun müəllimənin əməyi və qazandığı uğurlar bir çoxlarına nümunə və örnək sayıla bilər. Dursun müəllimə bu məktəbdə çalışmağı həm də şərəf sayır. Çünki bu məktəb Şəmkir məktəbləri arasında özünün zəngin ənənələri, təlim-tədrisin keyfiyyəti, pedaqoji uğurları ilə tanınan bir təhsil müəssisəsidir.

Gənc olmasına baxmayaraq bu gün Kür qəsəbə H.Z.Tağıyev adına 2 saylı orta məktəbin məzunlarının sorağı mötəbər ünvanlardan gəlir. Dursun müəllimənin iş metodu ilə tanışlıq zamanı bu qənaətə gəlirsən ki, o, yenilikçi adamdır, köhnə təfəkkür tərzindən qaçır, müasir təhsilin bütün tərəflərinə bələddir. Həm də bu bələdçilik yalnız nəzəri müddəaları mənimsəməklə bitmir. Bu, uzun illərin pedaqoji təcrübəsinin yaratdığı peşə vərdişidir. Dursun müəllimənin təhsil işçilərinin qarşısında duran vəzifələrlə bağlı təəssüratları da maraq doğurur. Deyir ki, bu gün orta təhsilin hansı metodlarla aparılmasından asılı olmayaraq müəllimlərin qarşısında duran ən əsas vəzifələrdən biri dövlətimiz üçün layiqli vətəndaşların yetişdirilməsinə nail olmaqdır. Çünki bu günün şagirdi sabah cəmiyyət həyatının hansısa sahəsində yer tutacaq bir vətəndaşdır. Dursun xanım yaxşı müəllim olduğu qədər də gözəl ailə başçısıdır, əsl anadır. Həyat yoldaşı Binnət müəllimlə birlikdə böyüdüb ərsəyə çatdırdıqları Ramil və Vüqarın uğurlarından ağızdolusu ilə danışır, bir ana kimi övladları ilə fəxr edir. Həm Ramil, həm də Vüqar Kür qəsəbə H.Z.Tağıyev adına 2 saylı orta məktəbin və Azərbaycan İqtisad Universitetinin məzunudurlar. Ramil iqtisad üzrə fəlsəfə doktoru, Vüqar isə ağırlıqqaldırma üzrə 4 dəfə dünya, 7 dəfə Avropa çempionudur.

Atalar yaxşı deyib - ot kökü üstə bitər.

Övladlarının həyatda qazandıqları nailiyyətlər Dursun müəllimənin həm də ana kimi övladlarına aşıladığı yüksək mənəvi və əxlaqi keyfiyyətlərin göstəricisidir. Xatırladaq ki, Vüqarın idmanda qazandığı nailiyyətlər Prezident İlham Əliyev tərəfindən yüksək qiymətləndirilib. Müəllimin şagirdə verdiyi bilik onun bir şəxsiyyət kimi formalaşmasında, həyatın enişli-yoxuşlu yollarında tab gətirməsi üçün mənəvi azuqədir. Bu azuqəni yetirmələrindən əsirgəməyən Dursun Quliyeva şagirdlərinin qəlbini pedaqoji ustalığı ilə isitməyə nail olan müəllimədir. Deyir ki, həyatda heç kəs ata-ananı əvəz edə bilməz. Amma müəllim şagirdin ürəyinə girməklə onun valideyn sevgisinə şərik çıxa bilər. Xoşbəxt müəllim o kəsdir ki, onun şagirdi müəllimə oxşamağı arzulasın. Dursun Quliyeva məhz belə müəllimlərdəndir.

Xəlil Cabbarov