Mənalı həyatın səhifələri və ya elmin ziyası ilə döyünən ürək

Azərbaycan Respublikasının tanınmış ziyalılarından olan kulturologiya elmləri  doktoru, professor, “Azərsu” ASC-nin sədrinin müşaviri Çingiz Əli oğlu Abdullayevin bu ilin aprelində  60 yaşı tamam olmuşdur. Zəngin, mənalı, maraq dolu həyat yaşayan Çingiz Abdullayev cəmiyətimizin bir çox sahələrinə öz töhfəsini vermiş, özünün çoxşaxəli yaradıcılığı ilə Azərbaycan ictimaiyyətinin diqqətini cəlb etmişdir.

Həyatının böyük hissəsini ölkədə tarixən mövcud olmuş multikultural mühitin laylarından olan alman qatları ilə bağlayan Ç.Abdullayev çağdaş dövrümüzdə Azərbaycan və alman xalqlarının mədəni əlaqələrinin inkişafında xüsusi iz qoymuşdur. 1990-cı ildən Alman-Azərbaycan Cəmiyyətinin nümayəndəsi, 1994-cü ildən isə həmin cəmiyyətin sədri olan Ç. Abdullayev iki ölkə arasında elm, təhsil mübadiləsinin aparılmasında xüsusi xidmətləri ilə, Azərbaycanda kökləri qədim zamanlara gedən tolerant dəyərlərin beynəlxalq aləmin geniş auditoriyasına catdırılmasında əldə etdiyi zəngin təcrübəsi ilə ölkə ictimaiyyətinin rəğbətini qazanmışdır. Alman-Azərbaycan Cəmiyyətinə rəhbərlik edən professor Ç. Abdullayev bu qurumun istiqamətlərindən biri kimi Azərbaycan tarixinin alman səhifələrinin və o cümlədən Azərbaycan və alman xalqlarının qarşlıqlı tarixinin öyrənilməsini götürmüş, almanların Azərbaycanda məskunlaşmalarıının 190 illiyi və 200 illiyi  münasibəti ilə həm xarici ölkələrdə, həm də Azərbaycan Respublikasında  bir sıra silsilə tədbirlər keçirmişdir. Bu sırada Ştutqart Beynəlxalq Əlaqələr İnstitutunda, Tiflisdə Höte İnstitutunda, Moskvada Almanların Mədəniyyət Mərkəzində, Bakı Slavyan Universitetində, AMEA-nın Tarix Muzeyi, Tarix İnstitutunda foto sərgi və beynəlxalq konfranslar yaddaqalandır. Keçirilən tədbirlərdə belə bir reallıq vurğulanmışdır ki, Almaniya və Azərbaycan arasındakı tarixi dostluq əlaqələri unudulmamış və bugün də yaşamaqdadır. Bu həqiqətləri göstərən yaradıcı ziyalı cəmiyyətin xətti ilə Azərbaycan və alman xalqlarının tarixi-mədəni əlaqələrini işıqlandıran “Simenslər-150”, “Almanlar-200” kataloqlarını nəşr etdirmiş, almanların Cənubi Qafqaza köçmələrinin 200 illiyinə həsr olunmuş “İkinci Vətən” adlı filmin ərsəyə gəlməsində öz əməyini əsirgəməmişdir. 

Ç.Abdullayevin ictimai fəaliyyəti və beynəlxalq səviyyədə əldə etdiyi təcrübə və təşkilatçılıq işləri  ölkə və beynəlxalq ictimaiyyət tərəfindən rəğbətlə qarşılanır. O, ictimai fəaliyyətinə görə “Sülh səfiri” fəxri adına  layiq görülmüş və bir çox beynəlxalq təşkilatların xatirə medalları və diplomları ilə təltif olunmuşdur.  Tanınmış ziyalı Azərbaycanda və bir çox xarici ölkələrdə fəaliyyət göstərən beynəlxalq təşkilatların - “Simurq” Beynəlxalq Mədəniyyət Assosiyasının İdarə heyətinin (Azərbaycan), Azərbaycan Jurnalistlər Birliyinin, Azərbaycan Yazıçılar Birliyinin,  Alman Dili Müəllimlər Birliyinin (Almaniya), Rusiyada və MDB ölkələrində Almanların tarixi və mədəniyyəti Assosasiyasının üzvüdür. 
Elmin ziyası, bəşər mədəniyyətinin həmişəyaşarlığı ilə ürəyi döyünən professor Ç.Abdullayev 100-dən çox elmi əsərin, 1 ixtiranın müəllifidir. Onun kitabları dünyanın bir çox ölkələrində saxlanılır.Yaradıcıilq ruhu ilə yaşayan tanınmış alim  bir sıra sənədli filmlərin ssenarisini yazmış, onlar  ölkə və  ölkə xaricində lentə alınmışdır. Həyatı boyu əldə etdiyi elmi-nəzəri təcrübəsini gənc nəslə çatdırmaqdan yorulmayan, ali məktəb auditoriyalarında mühazirələr oxuyan Ç.Abdullayev bir neçə doktorantın elmi rəhbəridir.
    
Geniş ürəyə malik, əməksevər, xeyirxah, sədaqətli insan, gözəl ailə başçısı Çingiz Abdullayevin 60 illik yubileyini təbrik edir, ona işıqlı həyat, yeni yaradıcılıq uğurları arzulayıram.

Həcər Verdiyeva

Tarix üzrə elmlər doktoru