Ələddin Allahverdiyev "Düşüncələrimin kölgəsi" kitabı haqqında

İstedadlı yazıçı-publisist Rüstəm Dastanoğlunun “Düşüncələrimin kölgəsi” kitabının təqdimat mərasiminin iştirakçılarına Hörmətli dostlar! Hər birinizi salamlayır, işinizdə uğurlar diləyirəm! Hər bir insanın mənəvi dünyasının, ətrafda baş verən olaylara onun fəlsəfi baxışının, dünyagörüşünün formalaşmasında doğulduğu yerin, uşaqlıqdan boy atdığı əxlaqi-dini-ədəbi-tarixi mühitin, özəyindən tərbiyə aldığı adət və ənənələrin təsiri danılmazdır və bir qayda olaraq həlledici rol oynayır.

Bu gün oxucusuna təqdim olunan “Düşüncələrimin kölgəsi” kitabının müəllifi istedadlı yazıçı-publisist-filosof Rüstəm Dastanoğlu Azərbaycan-Türk ədəbi irs xəzinəsinə, İslam və təsəvvüf dünyasına Misgin Abdal, Ağ Aşıq Allahverdi, şair Məmmədhüseyn, Ustad Aşıq Alı, Dədə Ələsgər, Növrəs İman kimi dühalar bəxş etmiş saz-söz sənətinin beşiyi qədim Göyçə mahalında, onun Seyid Bayram ocağıyla, çoxsaylı şair və aşıqlarıyla, maarifpərvər ziyalılarıyla tanınan, məşhur olan Daşkənd kəndinin yetirməsidir. Uşaqlığını və yeniyetməlik illərini poetik sözə qiymət verə bilən, adət və ənənələrə hörmət edən, saza məhəbbət bəsləyən, dinə bağlı saf, sadə, qonaqpərvər, zəhmətkeş, xeyirxah insanlarıyla, füsunkar təbiət gözəllikləri ilə zəngin olan Göyçədə, doğma kəndində keçirmiş Rüstəm Dastanoğlunun ilkin mənəvi-əxlaqi-fəlsəfi dünyagörüşü məhz bu məkanın və mühitin təsiri altında formalaşmağa başlamış, onun gələcək həyatında – ali təhsilində, məhsuldar, istedadlı yaradıcılığında, ictimai və iş fəaliyyətində mühüm rol oynamışdır. Mətbuatda dərc olunan bir çox ədəbi-bədii, publisistik yazıları, Rüstəm müəllimin məntiqə və reallığa əsaslanan özünəməxsus analitik düşünmə tərzinə, ətrafda baş verən olaylara düzgün qiymət vermək bacarığına, analiz və təhlillər zəminində onları ümumiləşdirmək qabiliyyətinə malik olduğunu göstərir. “Düşüncələrimin kölgəsi” kitabına daxil olmuş yazılar istedadlı publisist-yazıçının həyat təcrübəsinin, düşüncələrinin, onun maraq dairəsində olan mövzularla bağlı fikirlərinin bir hissəsi olaraq, kitabın adından məlum olduğu kimi, onların silueti-kölgəsidir. Bu isə bizə ümid və əminlik verir ki, istedadlı yazar Rüstəm Dastanoğlu onu narahat edən Vətən, Göyçə, Gənclik, Dövlət, Həqiqət və digər bəşəri problemlər haqqında düşüncələrini gələcəkdə də yeni kitabları vasitəsilə öz oxucularıyla, xüsusilə, gənclərlə bölüşəcəkdir. “Düşüncələrimin kölgəsi” kitabının işıq üzü görməsi, təqdimatı münasibətilə hörmətli Rüstəm Dastanoğlunu təbrik edir, ona can sağlığı, yeni yaradıcılıq uğurları diləyirəm!

Hörmətlə: Ələddin Allahverdiyev, professor,

Moskva, 04.02.2023.