Gənc elçimiz Sabir Rüstəmov

Əslən Qərbi Azərbaycanın (indiki Ermənistan Respublikasının) Göyçə Mahalının Basarkeçər rayonunun Balaməzrə (Kiçik məzrə) kəndindəndir. Mərhum aqronom Sabir Rüstəmovun nəvəsidir, babasının adını daşıyır. Rüstəmov Sabir Elşad oğlu 1997-ci ildə Özbəkistan Respublikasının Daşkənd şəhərində anadan olub. Rusiya Federasiyasının Moskva şəhərində 50 saylı liseydə orta təhsilini almağa başlayıb. 8-ci sinifdən isə təhsilini Bakı şəhəri Nərimanov rayon 200 saylı tam orta məktəbdə davam etdirib. 2015-ci ildə həmin məktəbi əla qiymətlərlə bitirərək Bakı Dövlət Universitetinin Beynəlxalq münasibətlər və İqtisadiyyat fakültəsinin Politalogiya ixtisasına qəbul olub.

2012-ci ildə Basketbol üzrə Yeniyetmələrdən ibarət Azərbaycan Milli Yığmasının tərkibində, Bolqarıstan, Türkiyə, Qırğızıstan, Yunanıstan, BƏƏ (Dubay) kimi bir çox ölkələrdə keçirilən yarışlarda ölkəmizin adından iştirak edib. Azərbaycan Respublikasının Gənclər və İdman Nazirliyinin dəstəyi ilə Azərbaycan ötən il 14-22 oktyabr tarixlərində Rusiya Federasiyasının Soçi şəhərində keçirilən " Dünya Tələbələr və Gənclər " festivalında böyük nümayəndə heyətinin tərkibində təmsil olunub. Azərbaycanlı gənclər (elm, informasiya və texnologiya, siyasət, idman, və s.) müxtəlif panellər üzrə çıxış ediblər.

Gənc Sabir Bakı Dövlət Universitetinin Beynəlxalq Münasibətlər və İqtisadiyyat fakültəsində təhsil aldığı üçün ölkəmizin gənc elçisi olaraq vətənimizi siyasi panellərdə təmsil edib. Festivalda 150 ölkədən 20 mindən artıq tələbə və gənclər iştirak edib. Siyasi panellərdə iştirak etdiyi zaman o bütün dünyaya Qarabağın Azərbaycan xalqına məxsus olduğunu çatdırıb. Festivalın üçüncü və dördüncü günlərində mövzu qaçqınlarla bağlı olub. O, çıxışında bildirib ki, Ermənistanın hərbi təcavüzü nəticəsində 1 milyona yaxın azərbaycanlı öz ata-baba yurdundan didərgin düşüb. Onu da qeyd edib ki, biz Ümümmilli Liderimiz Heydər Əliyevin qoyduğu və cənab prezidentimizin İlham Əliyevin uğurla davam etdirdiyi siyasət nəticəsində yaxın zamanda doğma torpaqlarımıza qayıdacağımıza inanırıq.

Onun çıxışları zamanı Rusiyanın Xarici İşlər Naziri Sergey Lavrov və nazir müavini Mariya Zaxarova və İtaliyanın Xarici İşlər Naziri Ancelino Alfano və başqa dövlət nümayəndələri iştirak edib. Eyni zamanda Azərbaycan Respublikası Gənclər Təşkilatları Milli Şurası tərəfindən həyata keçirilən “ Gənc Elçilər ” beynəlxalq təmsilçilik proqramının iştirakçısıdır. “ Gənc Elçilər ” beynəlxalq təmsilçilik proqramı Gənclər Təşkilatları Milli Şurası tərəfindən Azərbaycan Respublikası Xarici İşlər Nazirliyi və Gənclər və İdman Nazirliyinin dəstəyi ilə həyata keçirilir.

Proqramın məqsədi - Azərbaycanı əhəmiyyətli beynəlxalq tədbirlərdə layiqli təmsil edəcək “ gənc elçilərin ” yetişdirilməsi və gənclərin beynəlxalq əməkdaşlığının dəstəklənməsi, gənclər təşkilatlarının beynəlxalq əlaqələr sahəsində potensialının artırılmasıdır. 2016-cı ildə Moskva şəhərində Rusiya Federasiyası Gənclər və Uşaq Birləşmələri Milli Şurasının təşkilatçılığı bir çox dövlətlərin gənclər təşkilatları nümayəndələrinin iştirakı ilə gənclər arasında əməkdaşlığın və ictimai diplomatiyanın inkişafı istiqamətində " İctimai Diplomatiya Korpusu " adı altında keçirilən beynəlxalq tədbirdə Azərbaycan adından iştirak edib.

2015-2017 ci illərdə Azərbaycanı Rusiya Federasiyasının bir neçə şəhərlərində həmçinin, Türkiyə, İran, Belarusiya, Ukrayna və digər ölkələrdə beynəlxalq konfrans və formlarda yüksək səviyyədə təmsil edib. 2016-cı ildə Azərbaycan Respublikasının Xarici İşlər, İdman və Gənclər Nazirliyinin dəstəyi ilə “ Gənc Elçilər proqramı ” layihəsində Azərbaycanın gənc elçisi seçilib. 2017-ci ildə “Asan” Xidmətdə təcrübə proqramında 1-ci dərəcə üzrə sertifikat alıb. Görkəmli ictimai-siyasi xadim, millət vəkili Səməd Seyidovun siyasi psixologiya məktəbinin məzunudur. Hazırda BDU-da ali təhsilini davam etdirir və " Bakı Gənclər Klubu " İctimai Birliyində çalışır.

Vüqar İrəvanlı

Goyce.az